amalinks wokungena

Breaking News

Umongameli Mnangagwa Wethula Umbiko oweState of the Nation Address


Umongameli Emmerson Mnangagwa

Embikweni wakhe oqakathekileyo oweState of the Nation Address awthule ngoLwesibili, emsakazweni kamobonakude, uMongameli Emmerson Mnangagwa uchaze amabandla aphikisayo njengabathengisi njalo beyibo ababuyisela muva intuthuko yeZimbabwe.

Uqhubeke ethi kulabantu abasezweni labaphandle kwelizwe angabaqambanga ngamabizo ebasola ethi yibo abatshotshozela ukungahlaliseki lodlakela elizweni.

UMongameli weMthwakazi Republic Party, uMnu. Mqondisi Moyo uthi akulalothu alukhulumileyo umongameli useyehluleke ukubusa kasuke embusweni.

“Esithanda ukukutsho yikuthi akulalutho athe walukhuluma umongameli Emmerson Mnangagwa. Esingakutsho yikuthi yena leZanu-Pf sebeyehlulekile ukubusa ilizwe lifile akulamali akulalutho abantu bayalamba izibhedlela azisebenzi abantu bayabotshwa nje ngengxa kahulumende olucuku, obulala abantu ohlukuluza abantu. Thina njenge MRP sithi katshiye umbuso sekumehlule abhekane lamacala akhe awenzayo kudala awegukurahundi.”

Isikhulumi seMDC-T, uMnu Khaliphani Pugen uthi inkulumo kamongameli bayayamukela kodwa ayila sisombululo somkhuhlane weCOVID-19.

“Inkulumo kamongameli siyayamukela kodwa kukho konke akukhulumileyo akula sisombululo sokuthi njengoba ilizwe libhekane lobhubhano lweCovid-19 abantu bazasizwa njani bazaphiwani ukuze baphile ngesikhathi lesi esinzima kangaka.”

Isikhulumi seMDC-A, uMnu Swithern Chirowodza uthi inkulumo kamongameli kayakhi lizwe ngeyokudiliza.

“Yiyo inkulumo evela emuntwini owake wabiza aMaNdebele ethi ngamawuwu, ukwakhathesi usesithi abantu abakhuthaza uhulumende ukuba kungabi lobusela athi ngamadark forces, utsho ukuthi ngabantu abalamadlozi amabi, abalenhliziyo ezimbi kumbe abasetshenziswa ngusathane. Uzananzelela ukuthi linkulumo ayakhi sizwe, yinkulumo yokubulala, yokudiliza, inkulumo yomuntu owayekhona ekhokhela umbhuqazwe.”

UMongameli Mnangagwa kunkulumo yakhe ukhuthaze uzulu ukuba abambane amelane lalabo abaphambana lentuthuko yelizwe abenza imisebenzi yenkohlakalo.

UMnangagwa uchaze ukuba intuthuko lokungahlaliseki kwelizwe kuphanzamiswa ngamabandla ezombuso aphikisayo, umkhuhlane weCovid-19, ukuguquka komumo womkhathi kanye lezijeziso zomnotho ezetheswa ilizwe. Wathi uhulumende wakhe uphakathi kokubumba imithetho ezakwenza ukuba kube lokubusa okuqotho.

Inengi lithi umbiko kamongameli oweState of the Nation Address kawutsho lutho nanku phela wathi engena embusweni ngomnyaka ka 2017 ngemva kokuhluthunela umuyi uRobert Mugabe intambo zombuso encediswa libutho, wathembisa ukuba uzabusa ngcono kulomuyi uMugabe.

Udaba lombiko weSONA siluphiwa nguAnnahstacia Ndlovu
please wait

No media source currently available

0:00 0:04:13 0:00

Facebook Forum

XS
SM
MD
LG