UMongameli Mokgweetsi Masisi wakwele Botswana, osanda kuthatha intambo zombuso kulelozwe, wethekele kwele Zimbabwe ngoMvulo, kuhambo lwakhe lwakuqala lokuphuma elizweni lokhe egcotshwe ukuba ngumongameli ekuqaleni kuka Mabasa.
Kuhambo lwakhe, uMasisi ukhangelelwe ukuqinisa ubudlelwano phakathi kwamazwe womabili, njalo baqinise ukusungula uhlelo lokwakha injanji kaloliwe esuka kwele Mozambique, idlula eZimbabwe isiya kwele Botswana.
UMasisi othethe isikhundla sitshiyelwe ngobengumongameli uIan Khama, uqale walubhekisa kwele Namibia engakahambi eZimbabwe.
Uhambo lwakhe eHarare lulandela uhambo olufanayo olwenziwe ngomunye wakhe wakwle Zimbabwe, uMongameli Emmerson Mnangagwa, yena owethekelele uKhama ngoNhlolanja lonyaka.
Amazwe womabili akhangelelwe ukuqinisa ubudlelwano njalo uhambo lwakhe lolu lutshengisa ukuthi okwavunyelwana phakathi kwamazwe womabili ngesikhathi sikaKhama kuzaqhubekela phambili.
Unobhala ehofisini ebona ngendaba zaphandle kwele Botswana, uMnu. Gaeimelwe Goitsemang, utshele intathelizindaba ukuthi uhambo lukaMasisi ngolokuqinisa ubudlelwano lamazwe angomakhelwane.
"Lolu hambo yindlela yokuqhubeka siqinisa ubudlelwano lamazwe womabili. Ungakhumbula ukuthi uKhama uke wavakatshela eNamibia kukanti umongameli weZimbabwe wayelapha, ngakho sijonge ukwakha ubudlelwano."
Uqhubeke esithi okumqoka amazwe womabili azakuthinta ludaba lokwakhiwa kwenjanji ezasuka eMozambique, iquma eZimbabwe izocina kwele Botswana, yona ekhangelelwe ukuthuthukisa ezokuthenga lokuthengiselana emhlubulweni wangezansi kwezwekazi leAfrica.
LeZimbabwe siphakathi kohlelo lokwakha injanji singamazwe amathathu agoqela leMozambique, ngakho sifuna ukubona ukuthi inkulumo zingahamba ngesiphangi phangi ukuze sisungule uhlelo lolu."
Amazwe womathathu alobelana isivumelwano sokwakha injanji ezaba ngamakhilomitha angaba yinkulungwane lamakhulu amahlanu (1,500km), njalo ibe lendeko yezigidi zamadola eMelika ezidlela amakhulu ayisithupha ($600 million).
Abanye abeZimbabwe eGaborone abafana loMnu. Mbongeni Mguni, bathi uhambo luka Masisi esiya eZimbabwe masinya kangaka esesihlalweni, kutshengisa ukuzimisela ekulungiseni ubudlelwano, okwaqalwa nguKhama engakaphumi ehofisini.
“Singakhumbula, umongameli Khama wasesungule indlela yokulungisa ubudlelwano phakathi kwamazwe womabili, ngakho lokhu yisiqiniseko sokuthi akula okuzantshintsha kumbe okungaququka ngaphansi kukamongameli uMasisi, uma sikhangele udaba lweZimbabwe."
Ilizwe leBotswana ngelinye lamazwe amukela ngenjabulo ukungena kukaMnangagwa embusweni ngemva kokugenqulwa kombuso kowayengumongameli uMnu. Robert Mugabe, njalo besithi bazinikele ukuncedisa ukuvuselela umnotho weZimbabwe.
Amazwe womabili aphakathi kokukhulumisana phezu kokuphindela kweziphepheli zeZimbabwe, njalo bakhulumisana ngomthetho wokudubula inkomo zeZimbabwe ezingena eBotswana, besithi akudingwe eyinye indlela.
IZimbabwe inxuse iqembu lesizwe leBotswana elamaZebras, ukuthi bezodlala emdlalweni wokunanza uzibuse ngoLwesithathu weviki elizayo, okuyisibonelo sokukhumisana umlotha phakathi kwamazwe womabili.