amalinks wokungena

Breaking News

Umongameli Ramaphosa Uvezela Uzulu Impumela Yophenyo Lwenkohlakalo


South African President Cyril Ramaphosa

Izizalwane zeZimbabwe sezincome uMongameli Cyril Ramaphosa wele South Africa ngokuvezela ilizwe lonke umbiko ogcweleyo ngenkohlakalo eyabakhona kulelo lizwe eminyakeni elitshumi edluleyo.

Ngemva kweminyaka emine icwayisisa ngenkohlakalo eyenzeke kweleSouth Africa eminyakeni elitshumi edluleyo, ikomishini ebicwayisisa le inkohlakalo ikhiphe umbiko wayo wakuqala obhalwe emakhasini edlula amakhulu ayisitshiyagalombili (874 pages).

Lumbiko uveza inkohlakalo enkulu eyaguqisa amankampani akahulumende ngamadolo. Ukhombisa ukuthi abathile abakhethwa ngowayengumongameli Jacob Zuma ukuthi bakhokhele inkampani yezamandla kagetsi Eskom, eyezokuthutha iTransnet, eyendizamtshina iSouth African Airways, leyezemithelo iSouth African Revenue Authority, bathatha izinqumo ezavulela ubusela obukhulu kwantshontshwa izigidi zamarandi kula amankampani.

Lumbiko uveza njalo ukuthi ibandla le ANC laphatheka kuzehlakalo zenkohlakalo ezinengi ezigoqela ukuxhaswa ngemali ngamankampani aphiwa umsebenzi kuhulumende loba emakhansilini kusetshenziswa ubuqili.

Ngesikhathi esemukela lumbiko umnumnzana Cyril Ramaphosa uhle wakubeka kwacaca ukuthi uzawuvezela umphakathi njengoba unjalo. Lakanye ngemva kwamahola angatsholutho ewutholile uwufake kuwebsite yehofisi kamongameli ukuze ubonwe ngumuntu wonke. Ubuye wathembisa njalo ukuthi uzakhangela kakhulu lezo zinto umbikolo othi kazenziwe.

“Sizakwenza konke lumbiko othi kufanele sikwenze.“

Inyathelo likamnumnzana ramaphosa leli selitshayelwe izandla linengi lezizalwane zeZimbabwe. Isikhulumeli sebandla leZapu kweleSouth Africa umnumnzana Carnicious Nkala uthi kuqakatheke kakhulu ukuthi imbiko yamakomishini ibonwe nguzulu ukuze kungabi lento efihlwa ngabaphetheyo.

“Kuhle khona ukuthi uyipublishile ireport. Siyafisa lathi ukuthi lamanye amacommission ayenziwe eZimbabwe aluba ayapublishwa. Mhlawumbe bekuzenza ukuthi sikwazi ukuthi sikudiscusse with information and sikwazi ukubona ukuthi lapho okumele kwenziwe khona iprosecution or kuthathwe i action ethile ingathathwa yini, and also public opinion to influence and get to know ukungcola okukhona ngabantu abathile ukwenzela ukuthi singacini sesikhokhelwa ngabantu aba corrupt.”

Abanye bathi kuhle ukuthi iZimbabwe layo isebenze ngokufanayo ukuze kube lula ukuthi uZulu afuqe inkokheli zithathe amanyathelo ayabe ekhuthazwa yimibiko yamakomishini.

Isizalwane seZimbabwe umnumnzana Bongani Nyathi laye utshayela umnumnzana Ramaphosa ihlombe.

“Kutshengisa ukuthi umnumnzana uRamaphosa uzimisele ukulwa lokukhohlakala. Uzimisele ukulwa lecorruption. Kuqakathekile lokhu ngoba umnumnzana Ramaphosa ubonise ukuthi ipresidency yakhe loba ubukhokheli bakhe yibukhokheli obungazwani lenkohlakalo. Ukuveza kwakhe lokhu emphakathini kuqinisekisa khona ukuthi ungumkhokheli ongahlangani lenkohlakalo, ongafuni kuzibandakanyisa lento ezilenkohlakalo phakathi.”

Abanyeke bathi kuhle ukuthi leZimbabwe imibiko efana lowe Montlanthe Commission eyayicwayisisa ngokubulawa kwabantu ngamasotsha ngemva kokhetho, yethulwa emphakathini. Bakhona abathi lokhu akwenelanga nxa limbiko isithulwa emphakathini kodwa kungathathwa amanyathelo okujezisa lapho abatholakale besephula umthetho.

please wait

No media source currently available

0:00 0:03:54 0:00

Facebook Forum

XS
SM
MD
LG