Umongameli Donald Trump weMelika owebandla lamaRepublicans kanye lazancintisana laye kukhetho ngenyanga ezayo uMnu. Joe Biden webandla lamaDemocrats, baqhube imihlangano ehlukeneyo ngasikhathi sinye, eyama Town Hall meetings izolo eyokukhankasela lokukhetho.
Umsakazo kamabonakude oweNBC News uthi umongameli Trump uzincomile ngendlela aphatha ngayo udaba lweCOVID 19 okugoqela ukuvimbela indizamtshina ezivela eChina ukuthi zingene kweleMelika kusukela ngenyanga kaZibandlela ekuqaleni kwawonalo umnyaka.
Kodwa uMnu. Biden obese mhlanganweni ewolu obuthunganyelwa yintathelizindaba uGeorge Stephanopoulos we ABC News, ukusolile lokhu wathi umongameli Trump kazinikelanga kakhulu kuloludaba, ngoba wayezicabangela ngezomkambo wokuthengiselana owe-stock market.
UMnu. Biden uqhubeke wathi umongameli Trump ngabe wakhuthaza osibalukhulu labosodolobho elizweni jikelele ukuthi bevale indawo ezinengi ukwenzela ukulondoloza impilo yabantu.
Umongameli Trump uthe uNkosikazi Amy Coney Barrett asanda ukumkhetha ukuthi akhokhele idale leSupreme Court kasoze amsekele kudaba lwempumela yokhetho kungaba lensolo, kodwa uzalandela umthetho.
Uhlelo lokuvota solusunguliwe kwamanye amadolobho njalo umongameli Trump uthi uzakwamukela impumela yakhetho nxa kungalakuqilibezela.
UMnu. Biden uthembise ukusebenza lebandla lamaRepulicans enganqoba kukhetho. Bobabili bavumelene ukuthi lolu lukhetho oluqakathekileyo kumbali yeMelika.
Lokhu kuza ngemva kokuba umongameli Donald Trump enqabe ukuqhuba ingxoxo-mpikiswano ebulenjini loMnu. Biden ngemva kokutholakala elegcikwane leCOVID 19 esithi
