UMongameli weMelika uMnu Donald Trump, yena obanjwe ngumkhuhlane weCovid-19 uphume esibhedlela izolo ntambama lanxa nje odokotela besithi kakaphumi kungozi yalumkhuhlane.
UTrump wethule umbiko enkundleni yeTwitter esefikile esigodlweni sakhe eWhite House etshela abantu ukuthi bengaze bawesaba lumkhuhlane.
Wengeze wathi bengaze bawuvumele njalo uphazamisa impilo zabo.
Uthe njalo imithi ayiphiweyo esibhedlela imenza azizwe elomdlandla ayelawo eminyakeni engamatshumi amabili edluleyo.
UMongameli Trump uthe maduze nje eleMelika lizakuba selilawo umuthi wokwelapha lumkhuhlane.
Ubonge njalo odokotela labonesi besibhedlela seWalter Reed lapho abeselatshwa khona.
Abanye basole amazwi akhe okuthi abantu bengawesabi lumkhuhlane besithi uzakhuluma njalo njani wona usubulele abantu ebedlula 210,000 eMelika.
Omunye wabantu laba yisizalwane seZimbabwe esihlala eIndiana uMnu Muzobanzi Ncube yena othi uMnu Trump ubengamelanga aphume esibhedlela engakapholi.
