amalinks wokungena

Breaking News

Amapholisa eZimbabwe Abopha Umphathintambo Wezempilakahle uObadiah Moyo


Umphathintambo wezempilakahle uObadiah Moyo, lomele ilizwe leIndia eZimbabwe, uMnu. Rungsung Masakui.
Umphathintambo wezempilakahle uObadiah Moyo, lomele ilizwe leIndia eZimbabwe, uMnu. Rungsung Masakui.

Umphathintambo kahulumende obona ngezempilakahle, uMnu. Obadiah Moyo, usebotshiwe.

Ikhomishini yeZimbabwe Anti-Corruption Commission (ZACC) ithi uMoyo ubotshelwe ubukhohlakali obuhambelana lokuthengwa lokuthengiswa kwama masks okuvikela uzulu kumkhuhlane weCoronavirus COVID-19.

Isikhulumeli seZACC, uMnu, John Makamure, utshele umsakazo weZimbabwe Broadcasting Corporation ukuthi uMoyo usenkambeni yeRhodesville Police Station.

UMakamure uthe uMoyo ukhangelelwe ukuthi uzamiswa emthethwandaba ngoMgqibelo.

Ucatshengelwa ukuthi wavumele inkampani yeDrax International ukuthi ithenge okokuhlola abantu igciwane leCOVID-19 kungalandelwanga imithetho kahulumende.

Umqondisi wenampani le, uDelish Nguwaya, uvalelwe entilongweni. Umthethwandaba walile ukuthi ahlawule isibambiso se-bail. UNguwaya, owaziwa ukuthi wake wadala elinye icala eZimbabwe, kubikwa ukuthi udlelana lemuli kaMongameli Emmerson Mnangagwa.

Kodwa iziphathamandla zikahulumende ziyakuphika lokhu loba kulemifanekiso eveza uNguwaya etshaywa ngumoya elemuli kaMnangagwa.

Kasenelisanga ukuxoxa ngodaba lolu lesikhulumeli samapholisa, uSenior Assistant Commissioner Pauld Nyathi, obengaphenduli umakhalekhwinini wakhe.

Kodwa-ke abazingodaba lolu abangamapholisa bathi uMoyo ulakho ukwetheswa lecala lokuthi wenza ukungethembeki esebenzela uhulumende.

Kusanda kubotshwa iziphathamandla zenkampani yeNational Pharmaceutical Company okucatshangelwa ukuthi zaphathisana loMoyo loNguwaya ekuthengeni amaCOVID-19 test kits lokunye okokulwisana lomkhuhlane weCoronavirus.

XS
SM
MD
LG