Ekhuluma lentathelizindaba ngemva komdlalo phakathi kweMalawi lamaWrriors, ophele zingutshiki lobhanqa kungela qembu elenelise ukulitshayela emambuleni, umqeqetshi wamaWarriors uZdravko Logarusic uthi iqembu lakhe lidlale kuhle nxa kukhangelwa ukuba kalizange lilungiselele ngemfanelo.
Iqembu le Zimbabwe libe lethuba lokuzilolonga elilodwa kuphela phambilini kokuba libhekise amabombo kwele Malawi.
Abanye abadlali bahlangane labanye khonale eMalawi okutsho ukuba badlale bengazange belungiselele bendawonye labanye.
Umlandeli womdlalo wenguqu uCassie Zoza uthi impumela yangeSonto yiyo eyenza inhlanganiso ye Zimbabwe Football Association iqhubekele phambili ingenzi kuhle ngoba ukuphazamisa kwayo kungabonakali enkundleni.
“Ukuba ngutshiki lobhanqa leqembu le Malawi okwenziwe liqembu lama Warriors kwenza kungasakhanyi obala ukuba inhlanganiso ye Zifa ibingaqhubanga kuhle umsebenzi wokubiza abadlali kanye lokulolonga iqembu.
Okusalayo kodwa umqeqetshi kufana lokuthi ulokhu engakaqali ngoba inengi labadlali akade efuna ukubabona ababuyanga.
Kuzamele nxa sekulungiselelwa imidlalo leqembu le Algeria inhlanganiso ye Zifa ikhuphule amasokisi ngoba singaba yinhlekisa,” kutsho uZoza.
Bekungumdlalo wakuqala umqeqetshi uLogarusic ezibambe esidukwini njalo isifiso sakhe besingesokuthi abone abadlali abadlala phetsheya kolwandle kodwa inengi labo kababuyanga ngemva kokuba inhlanganiso ye Zifa iphuze ukulobela amaqembu abo.
Abadlali abadlala phetsheya kolwandle abayenelise ukuzodlala ngeSonto ngababalisa uMarvelous Nakamba, odlala kwele Ngilandi, uTeenage Hadebe, odlala eTurkey kanye lo Alec Mudimu, odlala eMoldova.
Iqembu lama Warriors lilungiselela ukudlala leqembu le Algeria kumkhankaso wokudinga amaqembu azakuyadlala kumncintiswano wokudinga intshantshu zezwekazi lase Africa ozaqhutshelwa elizweni lase Cameroon ngomnyaka ka 2022.
Iqembu le Algeria yilo elihlezi phezu kwesibaya sika Group H lilemiklomelo eyisithupha kusithi ele Zimbabwe lihlezi endaweni yesibili lilemiklomelo emine.
Endaweni yesithathu kuhlezi iqembu le Botswana elilomklomelo owodwa kuthi ele Zambia yilo elihlezi emsileni wengalane lingela ngitsho lowodwa umklomelo.
Amaqembu azaphutsha imidlalo yezibaya esendaweni ezimbili eziphezu kwengalane yiwo azathola ilungelo elokuyadlala kumncintiswano ozaqhutshelwa kwele Cameroon.
