amalinks wokungena

Breaking News

Umsekeli Wommeli weMelika eZimbabwe, uMnu. Thomas Hastings Wethekelela Indawo Eziqhutshwa Inhlelo zePEPFAR


Umnu. Thomas Hastings umsekeli wommeli weMelika eZimbabwe.
Umnu. Thomas Hastings umsekeli wommeli weMelika eZimbabwe.

Umsekeli wommeli weMelika eZimbabwe, uMnu. Thomas Hastings lamhlanje wethekelele indawo zesigabeni seMandebeleni eziqhutshwa inhlelo eziphathiswa ngoncedo lwemali evela elizweni lakhe, phansi kwesikhwama sePresident's Emergency Plan for AIDS Relief-PEPFAR.

UHastings wethekele izibhedlela ezigoqela eSigodini District Hospital leMpilo Central Hospital koBulawayo.

Ekhuluma kusehlakalo sokwethekelela esibhedlela seEsigodini uHastings uthe kuyajabulisa ukubona imitshina yakulezi insuku isetshenziswa lemidala ekwelapheni abantu abaphila legcikwane lengculaza njalo ikuzinga lokulandela iziqondiso zamazwe womhlaba zokuphathwa kwabaphila lalesi simo.

Umqondisi esibhedlela seEsigodini District Hospital, uDokotela Cleophas Kira Makonese uchasisa ukusebenza kwemitshina abalayo kulesi sibhedlela yokugcina imbali yezigulane.

''Uhlelo lweElectronic Health Record lwenza singasabi lamaphepha amanengi ungatsho ibizo lakho selibhaliwe esibhedlela uyathola usizo masinyane ukuze ungatholi ukuhlala esibhedlela masinyane.''

UMongikazi omkhulu Esigodini District Hospital, uNkosikazi Mavis Nyoni yena uchasisa ngokusebenza kohlelo lokuphathwa kwabantu abazohlolwa okwakuqala labavele sebephila legcikwane lengculaza.

''Luyasinceda kakhulu ukuthi lapho abavela khona singayafika lehlelo sibancedisa ukuthi baphile njani ekuzivikeleni kumkhuhlane wengculaza. Silohlelo lokusoka kumakilinika lapho abantu abasuka khona, silalamaphilisi avikela ukubamba umkhuhlane iPEP.''

UChief Medical Laboratory Scientist eMpilo Central Hospital, uMnu Abel Waldman uthi imitshina abayitholayo yakulezi insuku iyabanceda ukuphima ukuba igcikwane liyisilinganiso esingakanani egazini lomuntu.

''Kuyanceda kwenza amaviralload test ukuthi ikhule kanganani emzimbeni lokuthi imithi oyiphiwayo iyasebenza na. Sisebenza ukwedlula ezinye izibhedlela ezweni, sikhangela uBulawayo, Midlands, Matabeleland South leNorth kunye leMashonaland West. Sibalodubo lokuhamba kwamandla kaesti, amanzi kanye lemitshina ephuza ukukhupha impumela.''

Uhulumende weMelika usesebenzise ibhiliyoni yamadola eMelika ekuncediseni uhlelo lokusebenzisa imitshina yakulezi insuku ukugcina imbali yezigulane ezibhedlela kanye lokuhambisa imibiko yenhlelo yezempilakahle ezibhedlela ezedlula amatshumi ayisitshiyangalombili -83 ezweni. Ngaphandle kwemitshina emitsha eyafakwa esibhedlela seMpilo Central Hospital, koBulawayo lelo lizwe seliphathise kunhlelo ezimbalwa ezigoqela ukuhlolwa kwegazi labantu ukuba bazi isimo sokuthi balegcikwane kumbe hatshi, abangaba zinkulungwane ezilitshumi lambili ngelanga ezigabeni zeMatabeleland North, South, Bulawayo, Midlands leMashonaland West.

Iziphathamandla zeMpilo Central Hospital leEsigodini District Hospital babonge uhlelo lwePEPFAR bethi lwenza umsebenzi wokuphathisa abaphila legcikwane lengculaza ubelula njalo iGwanda leLupane isizakuba lemitshina yayo yodwa yokuhlola leligcikwane.

Udaba Esilethulelwe NguAnnahstacia Ndlovu
please wait

No media source currently available

0:00 0:04:37 0:00
XS
SM
MD
LG