Umthethwandaba weNomination Court uzahlala endaweni ezitshiyeneyo namuhla usamukela amabizo alabo abafuna ukuncintisa kukhetho lwamaby-elections mhlaka 26 ngoMbimbitho.
Ukhetho lolu ngolokugcwalisa izikhala ezingamatshumi amabili lambili ephalamende lezedlula ikhulu kumakhansili kulandela ukubhubha kwababeziphethe kanye lokuxotshwa kwamalunga ebandla likaMnu Nelson Chamisa eleMDC Alliance eselibizwa ngokuthi yiCitizens Coalition for Change (CCC).
IZimbabwe Electoral Commission (ZEC) yazise ukuthi ukhetho lwephalamende aluseyikwenziwa ezigabeni eziyisithupha ezibalisa esePumula, Nkulumane, Kambuzuma, Mbizwo, Mutasa South leHarare East ngemva kokuba inkantolo inqume ukuba ababekulezizikhundla abagoqela uMnu Tendai Biti loMnu Kucaca Phulu baxotshwa ngaphandle komthetho.
Likhomishini ithi ababhalisayo namuhla kumele baye emithethwandaba yabomantshi lasemahofisini amakhansili lapho okuzabe kuleziphathamandla zeNomination Court.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi bakhona abangela zithupha abangasoze benelise ukuvota kulawa maby-elections.
Kusenjalo, abebandla leCitizens Coalition for Change (CCC) abayisithupha asebebuyela ephalamende, bathi lanxa kubazwisa ubuhlungu ukuthi baxotshwa ngokungekho emthethweni, bayathokoza ngokubuyela ezikhundleni zabo.
Sixoxe lomunye wabo omela iNkulumane uMnu Kucaca Phulu yena othi ubefisa ukungena kumaby-elections ukuze atshengise sobala ukuthi ibandla leCCC lisekelwa kakhulu nguzulu.