amalinks wokungena

Breaking News

Ezemaphandleni: Inkulungwane Zinatha Emthonjeni Wethemba


Umlimi esensimini yakhe yomumbu

Sesisungule uhlelo lwezemaphandleni esizalethulela lona ngoLwesine maviki wonke.

Kuhlelo lwakuqala sikhangela udaba lokusilela kwamanzi eMatabeleland, okwenza ezinye izakhamizi zihambe umango omude ukuyakukha amanzi.

Ngokunanzelela udubo lolu, enye inhlanganiso ezimeleyo, iInternational Fountain of Hope, ithethe amanyathelo yaqala uhlelo lokugebhela izakhamizi izikotsho.

Kodwa umkhokheli wayo uMnu Raphael Mthombenmi uthi benza lokhu kuphela nxa bethe bathola izakhamizi eziqoqeneyo ezilesifiso sokuqala inhlelo zokulima ngokuthelezela.

“Sisebenza sisizana lezakhamizi ukuthi zithole amanzi, zithole ukudla,” kutsho uMthombeni ekhuluma leStudio 7 eseMelika lapho ahlala khona.

“Okwakathesi siseMatabeleland North leSouth singakaze sixhake siye kwezinye indawo," uqhubeke echasisa. "Imigodi esesiyigebhile okwakathesi ingu8.”

Ezikotshweni zonke lezi, izakhamizi ziqhuba inhlelo zokuthelezela njalo zilima umumbu, amatamatisi, imbida lokunye okutshiyeneyo besezithengisa zithole imali yokuziphilisa.

“Eyiyo ingqungquthela yakhona yiKafusi eGwanda South, yiyo ezikhokhelayo zonke besekulandela eseNkayi eLukamba,” uqhubeke echasisa uMthombeni.

“Ngemva kwalezi kulandela iLohontswana eTsholotsho, besekusiza iIrisvile eSigodini, iZimnyama ePlumtree, besekusiza koBulawayo eLuveve, leNewton West kulengadi enza kuhle kakhulu besesiseqa siye eNsangu eShangani.”

UMthombeni ukhuthaze uzulu ukuthi aphathise inhlanganiso yakhe ngemali ukuze benelise ukuqhubeka ngohlelo lwabo bencedise izakhamizi endaweni ezitshiyeneyo zelizwe.

“Akulula ukuyithola imali, silabangane lapha lalaphana, siyaqoqa lapha lalaphana lama-church bakhona abancedisayo. Lawe ngiyakucele khonapho ukuthi usincedise,” kutsho uMthombeni.

“Abangathanda ukuphathisa bayasithola ku-www.lovehopewater.org. Kulendawo khonalapho ongangena khona ubusuhlaba ukuthi donate, ubusu donetha ke.

“Asikhethi ukuba yimalini. Uhlupho nje yikuthi abantu bakithi abajayelanga ukuncedisa abantu bakibo. Bamelela abantu bezizweni ukuthi babe yibo abancedisa abantu bakibo."

Zizinkulungwane ezinhlanu izakhamizi eziphatheke kunhlelo zokulima ngokuthelezela lezi, kubike uMthombeni.

please wait

No media source currently available

0:00 0:05:40 0:00
Lapho esitholakala khona
XS
SM
MD
LG