Abantu beZimbabwe bakhanya bejabule okwamagama kulandela ukuxotshwa kukaMongameli Robert Mugabe, umkakhe kanye lequla leGeneration 40 ebandleni elibusayo.
Abantu abahlala ezabelweni zeMatabeleland bathi kusukela ilizwe lithatha uzibuse uMugabe bebevele bengamfuni ngakho-ke bayajabula ukuba ibandla lakhe lebutho njalo lozulu bathi kumele axotshwe.
Omunye walabo abafuna axotshwe nguNkosikazi Connie Mpala othe kuhle ukuba ibandla elibusayo selimxotshile uMugabe lekhosikazi lakhe.
Olwela amalungelo oluntu, uMnu. Mbuso Fuzwayo, uthe kusobala ukuba abantu babuhlungu njalo bafuna uMugabe aphume embusweni ngempela.
UMongameli weMthwakazi Republic Party, uMnu. Mqondisi Moyo, uthe abantu abayeke ukuba ngothathekile esithi baphatheka njani ekumkhupheni bengazange bephatheke ekumfakeni.
Kodwa-ke uthe kuhle ukuthi usexotshiwe ebandleni lakhe .
Isikhulumeli sebandla leZAPU, uMnu. Iphithule Maphosa, uthe akubamangalisi ukuxotshwa kwabo ngoba ibandla elibusayo alihlelekanga ethi iZimbabwe lomhlaba jikelele bebengasafuni ukuba abuse.
Osakhulayo uNkosazana Sipho Moyo uthe ulokudana lokujabula nomanje bebefuna ukuthi uMugabe aphume embusweni uhlupho yikungenela kwebutho elake lantshontshela ibandla leMDC umbuso bafaka uMugabe.
Uthe labazamfaka kumele ahlale esazi ukuthi kulobunzima.
NgoMgqibelo, emhlabeni wonke jikelele izizalwane zeZimbabwe zimanyene labalwa impi yenkululeko besekelwa libutho betshengisela ukuba uMongameli Mugabe kaphume embusweni.
NgeSonto amalunga edale lebandla elibusayo eleZanu PF Central Committee bahlangane bavumelana ukuthi sokumele baxotshe uMugabe esikhundleni bafake uMnu. Emmerson Mnangagwa owaxotshwa nguMugabe emethesa icala lokungathembeki.