amalinks wokungena

Breaking News

UMugabe Ucela Esinye Njalo Isikhathi Kudaba LwamaBy-Elections


UMongameli Robert Mugabe ucele idale leHigh Court okwesibili ngoLwesithathu ukuthi limuphe esinye njalo isikhathi sokuthi aphume lelanga lokhetho lwamaby-elections ezigabeni ezintathu zeMatabeleland ezithi iBulilima East, Lupane East leNkayi South.

Ekupheleni kwenyanga edluleyo, uMugabe ucele idale linye ukuthi limvumele ukuba ahlele ilanga lokhetho phakathi kwalinyanga.

Umthethwandaba lo umvumele ngakhoke besekusele insuku ezinhlanu kuphela ukuthi isikhathi lesi siphele.

Kodwa ngoLwesithathu amagqwetha kaMugabe abuyelile eHigh Court ayacela ukuthi imuphe kusiyafika umhlaka 31 ngoMbimbitho womnyaka ozayo lapho athi uzabe seyenelise ukuqoqa ukuthi ukhetho ezigabeni zontathu luzakwenziwa nini.

Kunyanga ezimbili ezedluleyo idale leSupreme Court lilaye uMugabe ukuthi aphume lelanga lokhetho lolu, ngemva kokuba ehanjiswe kuleli dale ngoMnu Abednico Bhebhe, Njabuliso Mguni loNorman Mpofu.

Abathathu laba baxotshwa kuMDC ekhokhelwa nguMnu Welshman Ncube bahle belahlekelwa yizihlalo zabo zedale lephalamende.

Igqwetha labo uNkosikazi Beatrice Mthethwa ufakazile kulumsakazo ukuthi uwamukele amaphepha esicelo sikaMugabe.

IHigh Court ikhangelelwe ukwethula isinqumo sayo ngoLwesine kumbe ngoLwesihlanu.

IStudio 7 ixhume igqwetha uMnu Matshobana Ncube yena othi okwenziwa nguMugabe kuveza sobala ukuthi kayihloniphi imithetho yelizwe.
XS
SM
MD
LG