amalinks wokungena

UMugabe Uzasusa uMnangagwa na Esikhundleni Kungene uGrace Mugabe?

  • Gibbs Dube

UMongameli Robet Mugabe.

Ezinye izizalwane zeZimbabwe zithi uMongameli Robert Mugabe ulakho ukuxotsha umsekeli wakhe, uMnu. Emmerson Mnangagwa, afake esikhundleni lesi umkakhe, uNkosikazi Grace Mugabe, osanda kuthethisa uMnangagwa esithi ufuna isikhundla sikaMugabe ngamehlo abomvu.

Abanye bazondile ngenkulumo yakhe le besithi kumele uMugabe labanye bakhe basuke esikhundleni ngoba sebebhidlize ilizwe elibhekane lokusilela kwemali okumangalisayo njalo lokugugudeka komnotho okwesabekayo.

Abaphendule imibuzo eyethulwe ngamakhasi okuzilibazisa ebulenjini beFacebook aweVOA Ndebele leVOA Studio 7 bathe kuyamangalisa ukuthi uMugabe ufuna ukuxotsha abanye abantu yena esehluleka ukubusa ilizwe.

Phakathi kwabantu abedlula ikhulu lamatshumi ayisithupha abaphedule imibuzo yokuthi uMugabe engaxotsha uMnangagwa kumbe afake umkakhe esikhundleni lesi, inengi labo lithi akukhanyi kahle ukuthi kuzakwenzakalani.

Kodwa abanjengo Frank Totowe loUnique Nheta bathe babona engani selidumela emansumpeni ukuthi uMugabe axotshe uMnangagwa.

Abasekela lokhu ababalisa uBrighton Khayami Ndebele bathe kusobala ukuthi uMugabe uzakhetha unkosikazi wakhe ukuthi angene kwesinye isikhundla samalunga edale leCabinet.

“Kusobala ukuthi uzakwenza lokhu. Angithi iZimbabwe ngeyakhe wenza noma yini ayifunayo ukuthi kulabantu akakucabangi kuphela yena lomdeni wakhe. Yizo izizalwane zeZimbabwe njengoba bethenga izimota zohlobo olubiza izigidi lezigidi zamadollar lezindlu ngapha kwelaseningizimu Africa…”

Lokhu kusekelwe ngu Nyangazonke N. Moyo, othe, “Uzikwenza lokho, kukhona azobalahlela ngaphandle ukuvulela uGrace isihlalo.”

Uphinde wathi, “... Kodwa uMnangagwa akayindawo angiboni bemgudluza.”

UBernard Sibanda laye ubona engani uMugabe uzakwenza santando ngeviki ezayo njengoba ethembise ukuthi uzasa amanye amalunga kahulumende ezihlalweni.

“Engakweza nje lokho ngoba vele banzezela umathanda elizweni lomkakhe uGrace (Mugabe). Njalo akukho kuZanu PF ongaphikisana laye bazitshayela isiginci abasithandayo elizweni lomkakhe njalo ngesikhathi leso ayabe befuna ngaso.”

UWisdom Maphosa, laye ophose elakhe ebulenjini bokuzilibazisa kukhasi leVOA Ndebele, uthe uMugabe wenzela umkakhe konke lokhu ngoba usehlala ekhala ngokuthi kumele kundigwe ozathatha isikhundla sakhe engasuka embusweni.

Kodwa-ke bakhona abanjengo Simbarashe Mauta abathi kayindawo uMnangagwa.

“Bakhona abazonda uMnangagwa yena ovele elubambo lwebandla elibusayo. Nguye owenza ukuthi ibandla leZanu lingabhidliki. UMugabe segugile kodwa kalabutshapha ngoba uyakwazi ukuthi kuyingozi ukukhipha ugodo olujeke umduli emgodini umuntu elokhe ephakathi kwawo. Nxa ungadilika umgodi lo uMugabe loGrace (Mugabe) bayabe bephakathi kwawo kodwa uMnangagwa esephandle.

"Okusobala yikuthi ulakho ukususa abantu abasekela uED (Emmerson Mnangagwa). Bafuna ukumthundubeza hatshi ukumxotsha. Nxa unkosikazi wakhe engaqhubekela phambili efuna ukuthi baxotshe uMnangagwa, uMugabe ulakho ukudliwa kukhetho oluzakwenziwa ngomnyaka ozayo.”

Kulabanye abaphikise umbono lo besithi uMnangagwa kalamandla amakhulu kubandla leZanu PF ngakho uMugabe ulakho ukumxotsha engalahlekelwa lusekelo ngoba usesekelwa ukulez’insuku ngabatsha njengoba waxotsha abalwa impi yenkululeko.

UMnangagwa loNkosikazi Mugabe kubikwa ukuthi bakhokhela amacele kubandla elibusayo abafuna ukuthi omunye wabo athathe isikhundla sakhe engasuka embusweni.

Ababili laba bayakuphikisa lokhu.

Facebook Forum

XS
SM
MD
LG