Okwakuqala selokhu waxotshwayo kubandla le Zanu PF, uNkosikazi Joyce Mujuru, owake waba ngumsekeli kamongameli osekhokhela ibandla eliphikisayo ele National People’s Party, uthi iZimbabwe Electoral Commission yehluleke ukuqhuba ngemfanelo ukhetho lwe by-election olusanda kwenziwa koChiwundura eNkabazwe.
UMujuru utsho lokhu emhlanganweni lentathelizindaba ngemva kokulobelana phansi isivumelwano sokusebenzelana labe bandla le Democratic Assembly for Restoration and Empowerment (DARE), elikhokhelwa nguMnumzana Gilbert Dzikiti.
Umsekeli kanobhala jikelele ebandleni le DARE, uMnumzana Edmond Gonde, uthe bona kasibamangalisi lesi sehlakalo.
Ubuqili be Zanu PF kulolukhetho isebenzisa ikhomishini ye ZEC buvunjululwe ngabenhlanganiso yeElection Resource Centre (ERC) ngesikhathi behlola ukuqhutshwa kwalolukhetho lwako Chiwundura ngempelaviki.
Abenhlanganiso lezi baveze ukuba amagama abantu phose inkulungwane – 863, yababhalisa kugwalo lwabalelungelo lukuvota, abebhaliswe kanengi nengi.
Ngeviki ephelileyo, abasakhulayo be MDC-T, batshengisele eHarare befuna kuguqulwe indlela abe ZEC abaqhuba ngayo ukhetho okubalisa ukubhalisa abantu kakutsha, ukutshiya umsebenzi kukamgcinisihlalo we ZEC, uJustice Rita Makarau, kanye lokuba kungaqakathekiswa ubufakazi balapho umuntu ehlala khona nxa sokuyiwabhalisa amagama kugwalo lokuvota.
Kasenelisanga ukuthola iziphathamandla zeZEC ukuze zikhulume ngodaba lolu.