amalinks wokungena

'Kungaba Lomvukela eZimbabwe Kungaqhubekela Phambili Ukuxokozela kuZanu PF'


UMnu. Emmerson Mnangagwa loMongameli Robert Mugabe.

Ingcwethi ezicubungula ezombusazwe zithi eleZimbabwe lilakho ukuzithola seliphakathi komumo wokungahlaliseki, kulandela ukuxotshwa umsebenzi kobengumsekeli kamongameli, uMnu. Emmerson Mnangagwa

Lokhu bakutsho ngoba uMnangagwa ubikwa elosekelo phakathi kweziphathamandla ezebutho leZimbabwe ezifana locommander wohlangothi lwezomvikela ele Zimbabwe Defence Forces, uGeneral Constantino Chiwenga.

Ngaphandle kwengozi elakho ukuvela kubutho lakuleli, uMnangagwa ubikwa elosekelo lwabalwa impi yenkululeko abafunga betshaya ngenduku phansi bethi kabasoke bagoqa izandla uMugabe lemuli yakhe bethatha ibandla leZanu PF kanye lelizwe lonke jikelele njengelifa labo.

Leyimicabango evezwe nguMnu. Sipho Tshabangu isikhulumeli seqembu leZimbabwe Youths for Tolerance.

Ekuphumeni kwakhe elizweni ngemva kokuxotshwa kwakhe umsebenzi, uMnangagwa ufunge esithi kasoze wagoqa izandla uMugabe lomkakhe uNkosikazi Grace Mugabe bethatha iZanu PF beyenza eyabo.

Ingcwethi ecubungula ezombusazwe, UMnu. Martin Dube, uthi lokho kulakho ukuxega njalo abalandeli bakaMugabe loMnangagwa kubandla leZanu PF.

UMnu. Sibusiso Tshuma, uthi eleZimbabwe lizangena ebunzimeni obukhulu nxa lingehluleka ukusebenza ukulungisisa udaba luka Mnangagwa.

Ukuthukuthela okuphakathi kwelizwe yinto evezwe njalo ngumkhokheli webandla eliphikisayo ele MDC-T, uMnu. Morgan Tsvangirai, otshele intathelizindaba zeSouth Africa ukuthi ukuxothswa kuka Mnangagwa kulakho ukuletha ingxabangxoza elizweni.

UMugabe uveze ukuba sesimeni sokulwa, lapho kubikwa ukuthi ubesezimisele ukubopha uMnangagwa emethesa amacala okufuna ukumgenqula.

Inhlanganiso ezizimeleyo lazo zilo mcabango ofanayo. Zigoqela eyeZimbabwe Human Rights (ZIMRIGHTS) isithi okwenzakala kuZanu PF kulakho ukudalela ilizwe inkinga lisithi inhlanganiso ezinjenge SADC kumele zihlale ziqhaphele umonakalo ongaba khona eZimbabwe.

Facebook Forum

XS
SM
MD
LG