Umkhokheli weMDC-T, uMnu Douglas Mwonzora, ulakho ukubotshwa phezu kwecala lokuqamba amanga enkantolo kulandela ukumangalelwa kwakhe ngosanda kuxotshwa kulelibandla kanye lasesikhundleni sikaMayor weGweru, uMnu Josiah Makombe.
UMakombe umangalele uMwonzora enkambeni yeBulawayo Central Police Station ngoMvulo esithi kumele abotshwe ngoba eqambe amanga ngabomu kumthethwandaba weHigh Court esithi ibandla lakhe alixotshanga uMakombe yena ekwazi ukuba lokhu yikho kanye okwenzakeleyo.
UMakombe uthi uthole incwadi kumalanga asanda kwedlula ivela kumphathintambo obona ngendaba zezabelo, uMnu July Moyo, emazisa ukuthi usesusiwe esikhundleni sikaMayor ngemva kwesicelo seMDC-T ngoba isithi uMakombe akaselilunga layo.
Isisusa saloludaba yisicelo esifikiswe eHigh Court nguMakombe, uNkosazana Thokozani Khupe kanye loMayor weChitungwiza, uMnu Lovemore Maiko, kunyanga edluleyo besithi linkundla kumele uvimbe ukuxotshwa kwabo kuMDC-T nguMwonzora.
Kulapho-ke uMwonzora athi ephendule khona ngokulobela inkantolo esithi kungamanga ukuthi baqoqa ukuxotsha abathathu laba.
UMakombe utshele iStudio 7 ukuthi uMwonzora kumele abotshwe ngoba ukuqambela inkantolo amanga kulicala elikhulu, i-perjury ngesiNgisi.
Isikhulumeli seMDC-T, uMnu Witness Dube kaphendulanga imibuzo esimthumele yona ngaloludaba.