UMongameli Donald Trump uqhubekela phambili ezama ukuguqula impumela yokhetho lukamongameli olwenziwa ngoLwezi ngesikhathi uMnu. Joseph Biden elungiselela ukungena esikhundleni sikamongameli.
Abasekela uTrump sebephanyeke olunye njalo udaba enkantolo yeSupreme Court lapho abacela ukuba kudluliselwe phambili ukukhetha abantu abazavotela umongameli okuthiwa ngama electors njalo kulahlwe wonke amavoti enziwa ngeposo eGeorgia, Pennyslyvania, Wisconsin leMichigan.
UBiden wanqoba uTrump ezabelweni lezi kodwa uTrump uthi ukhetho lwebiwa libandla lama Democrats. Imithethwandaba ezabelweni lezi yathi akulabufakazi obuveza ukuthi ibandla lama Democrats laphekapheka ukhetho lolu. Izabelo zonke sezikhethile abantu okumele bavotele umongameli ngeviki ezayo.
Okwamanje uBiden kukhanya elama Electoral Votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili -232. Ingcwethi kwezemithetho zithi kuyamangalisa okwenziwa nguTrump okukhanya engasoze aphumelele kulokhu akwenzayo.
UMnu. Busani Mbuso Ntini, ingcwethi kwezombusazwe ezimeleyo, uthi uTrump uzama ngamandla zonke ukunqoba kukhetho lolu kodwa kukhanya engani iqinile imithetho yakwele Melika.
UMnu. Nkululeko Sibanda, isikhulumeli sikamongameli webandla leMDC Alliance, uthi okwenziwa nguTrump kuyafana lalokhu okwenzakala eZimbabwe. Kodwa uthi eMelika kulemithetho engavumeli umuntu ukuthi angene esikhundleni engaqedakaliyo.
Osekela uTrump, uMnu. Sikhumbuzo Mlalazi, uthi uTrump ulandela imithetho evumela ukuthi umuntu aphikise impumela yokhetho nxa engasuthiseki ngendlela oluqhutshwe ngayo. Uthi imithethwandaba iveza ukuba kulemithetho eqinileyo kwele Melika.
Kusenjalo, uBiden okwamanje usekhethe abanye abantu abazangena kudale leCabinet lezinye izikhundla zikahulumende eziqakathekileyo. Nxa engakhethwa ngemfanelo, uzangena ezsikhundleni sikamongameli ngoZibandlela.
