amalinks wokungena

Breaking News

'Ubukhohlakali Ngokunye Okwenza Abantu Behluleke Ukuzibusa'


UMongameli Mokgweetsi Eric Keabatswe Masisi.

Abasemhlanganweni oqoqwe ngele Melika owokuvuselela umbuso okhululekileyo kazulu emhlabeni wonke jikelele bathi ubukhohlakali ngokunye okwenza abantu behluleke ukuzibusa njalo lokuzithuthukisa.

Inkokheli zamazwe atshiyeneyo, abacubungula ezombusazwe labakunhlanganiso ezizimeleyo namuhla bavumelane emhlanganweni oqoqwe nguMongameli Joseph Biden oweSummit for Democracy owenzelwa enkundleni zokuxhumana, ukuba ubukhohlakali bunciphisa amathuba okuthi uzulu azibuse.

Omunye wabethule umbono lo emhlanganweni lo nguMongameli Mokwetsi Masisi wakwele Botswana.

“Ubukhohlakali benza abantu bengabi lomnotho ofaneleyo njalo kwephulwe amalungelo kazulu. Kwele Botswana sesiphume lesinqumo esokuthi abezombusazwe kumele balwisane lobukhohlakali. Sesikubone kufanele ukuba zonke inhlangothi zikahulumende zibelabantu abakhangelane lobukhohlakali.”

Lokhu kusekelwa nguMongameli Maia Sandu wakwele Moldova.

“Ubukhohlakali kumele silwisane labo ngokukhangela lapho okutshontshwa khona imali lalapho imali le ehanjiswa khona. Nxa singatholanga uncedo emazweni athuthukileyo, kuzakuba nzima ukuba silwisane lobukhohlakali. Ubukhohlakali bululaza indlela okubuswa ngayo. Lokhu kwenza ukuba abantu bengasathembi uhulumende.”

UMnu. Mo Ibrahim, usomabhizimusi olodumo, laye utshele umhlangano lo ukuthi ubukhohlakali bululaza abantu njalo bunciphisa amathuba okuba lombuso kazulu.

“Nxa sikhuluma ngombuso okhululekileyo kumele sikhulume njalo ngobukhohlakali ngoba lokhu kubhidliza konke okukhangelane lokuvuselela umbuso kazulu. Ubukhohlakali bubisela muva ezokuthengiselana, ezemali, ukulondolozwa kwezemvelo lokunye. Kwenza ukuba kungabi lokuzwanana phakathi kukahulumende labantu. Kuzwekazi leAfrica kutshotshwa imali ehanjiswa kwamanye amazwe eyedlula amabhiliyoni alikhulu - 107 ngomnyaka. Lokhu kwedlula imali abayithola kwamanye amazwe eyokuthuthukisa uzulu.”

Okwethulwe emhlanganweni lo kuhambelana lokwenziwe emhlabeni wonke jikelele izolo obekunanzwa usuku lokulwisana lobukhohlakali – olweWorld Anti-Corruption Day. Ingcwethi kwezombusazwe ezimeleyo, uMnu. Thabang Nare, uvumelana laye.

Umhlangano oweSummit for Democracy, oqale izolo, ugqitshwa namuhla. UMongameli Joseph Biden uvale okusemthethweni umhlangano lo esithi kumele inkokheli zakwamanye amazwe zivuselele umbuso okhululekileyo.

Facebook Forum

XS
SM
MD
LG