UMongameli Donald Trump, oselamalanga amathathu esesibhedlela eWalter Reed National Military Medical Center kulandela ukuhlolwa kwakhe watholakala eleCOVID-19, uthi usesizwa ngcono emzimbeni.
Wethule iVideo izolo kusihlwa esithi unatha imithi etshiyeneyo njalo ukhangelele ukuthi uzabuyela eWhite House kunsukwana ezilandelayo. Umphathintambo wenhlelo zonke eWhite House, uMnu. Mark Meadows, utshele umsakazo weFox News ukuthi basebethithibele ngokugula kuka Trump ngoLwesihlanu owayesetshisatshisa njalo esephefumula nzima.
Odokotela bakhe bathi usesizwa ngcono esibhedlela lesi lapho abamupha amaphilisi atshiyeneyo alakho ukunqunda igciwane leCOVID-19.
Okwethulwe ngudokotela wakhe kusolwe ngabanye abantu abathu akucaci okwenzakala kuTrump ngoba iWhite House yethule umbiko ongahambelani lokadokotela.
Okwamanje, uMnu. Joe Biden, ancintisana laye, uqhubekela phambili ekhankasela ukhetho oluzakwenziwa ngoLwezi.
Abantu abanengi bachothoza indlela uTrump avimba ngayo ukumemetheka kweCOVID-19 besithi wehluleka ukwenza okufuna ngebezempila kahle. Yena uthi wenza kahle. Akesizwe ekhuuma ngesimo sakhe esibhedlela se Walter Reed National Military Medical Center.
