amalinks wokungena

Breaking News

Sebevotela Umongameli eMelika Kulandela Ukhetho Olwenziwa NgoLwezi


Abakhetha umongameli bangena edale lemithetho ePennyslvania be

Abakhetha umongameli kwele Melika ababizwa ngokuthi yiElectoral College sebevotela uMnu. Joseph Biden loMongameli Donald Trump kulandela ukhetho olwenziwa ngoLwezi.

Isisekelo sombuso welizwe sikubeka sobala ukuba abakhetha umongameli kumele benze lokhu namuhla kulandela ukuhlelwa kwempumela yokhetho lukamongameli yizabelo zonke.

Lokhu kwenziwe ngeviki ephelileyo loba uTrump ubefuna ukuthi idale leSupreme Court lilahle amavoti wonke eGeorgia, Michigan, Wisconsin lePennyslvania lapho athi ukhetho lwebiwa libandla lama Democrats.

ISupreme Court yathi ayiboni ukuba ingahlolisisa udaba lolu ngoba izabelo zalahla amacala wonke aphanyekwa nguTrump esithi uqilwe nguBiden lebandla lakhe. Lokhu esithi waqilwa lobanje kungelabufakazi.

Kukhanya engani akukho okunye angakwenza emithethwandaba ngakho-ke usezama ukuthi abakubandla lakhe edale leHouse of Representatives bezame ukuvimba amavoti kaBiden edale leli mhlaka 6 Zibandlela.

Kodwa ingcwethi zombusazwe zithi kunzima ukuba bekwenze lokhu. UTrump lokhu esethula imibiko enkundleni yokuxhumana eyeTwitter esithi wanqoba kukhetho lukamongameli.

UBiden ulama electoral votes edlula amakhulu amathathu – 306 kuthi uTrump ulangamakhulu amabili lamatshumi amathathu lambili - 232.

Onqoba kukhetho lukamongameli kumele athole amavoti angamakhulu amabili lamatshumi ayisikhombisa – 270.

Ingcwethi kwezombusazwe ezimeleyo, uMnu. Busani Mbuso Ntini, uthi kukhangelelwe ukuthi abakhetha umongameli bazalandela umthetho bavotele uBiden.

UNtini uthi okwenziwa nguTrump okwamanje kulilungelo lakhe njalo kukhanya eqhubekela phambili esenza ukuthi uBiden abuse nzima engangena esikhundleni.

Abasekela uTrump, abanjengo Mnu. Steve Scalise, omele isabelo seLouisiana edale leHouse of Representatives, uthi kazimiselanga ukwamukela amavoti kaBiden njengabanye bakhe abasekele uTrump ezama ukuguqula impumela yokhetho ezabelweni eziqakathekileyo okwanqoba khona uBiden.

Idale leHouse of Representatives lele Senate akhangelelwe ukuthi azemukela ama electoral votes mhlaka 6 Zibandlela akhulume ngawo kulabanye abazaphikisa impumela yokhetho lukamongameli olwenziwe ngoLwezi besithi lwebiwa libandla lama Democrats.

Kodwa abazi ngokwenzakala kwele Melika bathi lokhu kuyake kwenzakale nxa amadale la angahlangana kodwa akuzake kuguqulwe impumela yokhetho olwenziwa ngabakhetha umongameli.

UBiden wanqoba uTrump ngamavoti adlula izigidi eziyisikhombisa elizweni lonke jikelele kodwa amavoti la kawatsho ukuthi usekhethiwe ukuba ngumongameli.

Abavota lamuhla yibo abalamavoti akhetha umongameli bethunywe yizabelo zabo. Akwaziwa ukuthi eleMelika lizasebenza njani lele Zimbabwe uBiden engangena esikhundleni ngoZibandlela. Kulabanye abathi kababoni uBiden eguqula ezombusazwe eZimbabwe.

UMnu. Phephisani Sangweni ngomunye wabalo mbono lo.

Lokhu kusekelwa nguMnu. Garnet Ngulube.

Kulabanye ezabelweni ezitshiyeneyo abathi bethuselwa ngabasekeli baka Trump abathi akumelanga uBiden angene esikhundleni sikamongameli.

Facebook Forum

XS
SM
MD
LG