amalinks wokungena

Breaking News

Kwethulwa Amavoti Edale leU.S. Congress uTrump Esidla Amalahle Esithi Waqilwa Kukhetho Lukamongameli


UMnu. Joseph Biden ulamavoti amanengi okwedlula akaMongameli Donald Trump.

Idale leCongress likhangelelwe ukuthi namuhla lizabala abavoti aweElectoral College aveza ukuba uMnu. Joseph Biden, owebandla lama Democrats, wanqoba uMongameli Donald Trump kukhetho lukamongameli olwenziwe ngoLwezi nyakenye.

UTrump ufuna ukuvimba impumela yokhetho lolu esithi waqilwa nguBiden lebandla eliphikisayo.

Abasekela uTrump abagoqela uSenator Josh Hawley, Senator Ted Cruz labanye bathi bazavimba impumela yokhetho ePennyslvania, Arizona lezinye indawo abathi ukhetho aluqhutshwanga ngemfanelo.

Bakhona njalo abaku House of Representatives abathi bazakwenza okufanayo. Kukhangelelwe ukuthi amalunga eSenate leHouse of Representatives bazahlafuna udaba lolu okwesikhathi eside umsekeli kamongameli, uMnu. Mike Pence abesesethula impumela yokhetho lolu.

UBiden ulama electoral vote edlula amakhulu amathathu – 306 kuthi uTrump ulangamakhulu amabili lamatshumi amathathu lambili – 232. UTrump uthi waqilwa kukhetho lolu. Akulabufakazi obuveza lokhu.

Abanye abalandeli bakhe bayatshengisela eWashington DC lezinye indawo besithi alwenziwanga ngemfanelo ukhetho eWisconsin, Pennyslvania, Georgia leMichigan okwanqoba khona uBiden.

Olandela ukhetho lolu, uMfundisi Raphael Mthombeni uthi akuyindawo okwenziwa libandla lama Republicans.

UMnu. Busani Mbuso Ntini uthi uTrump labanye bakhe bazama ukweba ukhetho.

Omunye njalo olandela ukhetho lolu, uMnu. Believe Gaule uthi okwenzakala eMelika kululaza ilizwe leli kwezombusazwe.

Kusenjalo, abakubandla lama Democrats abancintisa eGeorgia kukhetho oluphindwayo olwamalunga edale leSenate, uMfundisi Raphael Warnock loMnu. Jon Ossoff bakhangelelwe ukuthi bazanqoba uNkosazana Kelly Loeffler loMnu. David Perdue akade bemele isabelo lesi. Ibandla lama Democrats lizakhokhela idale leSenate kungenzakala lokhu.

Facebook Forum

XS
SM
MD
LG