amalinks wokungena

Breaking News

Idale leHouse of Representatives eMelika Livotela Ukuba uTrump Asuswe Esikhundleni


Idale leHouse of Representatives selithethe isinqumo sokuthi uMongameli Donald Trump kumele asuswe esikhundleni ngenxa yokuthi wephula isisekelo sombuse welizwe.

Amalunga edale leli angamakhulu amabili lamatshumi amathathu lambili – 232 avotele ukuba uTrump asuswe esikhundleni kwathi abafika phose amakhulu amabili – 197 bavotela ukuba aqhubekele phambili ngomsebenzi kamongameli.

Kodwa lokhu akutsho ukuthi uTrump usezaphuma esikhundleni njengoba isinqumo lesi eseImpeachment kumele sihlolisiswe lidale leSenate elikhokhelwa nguMnu. Mitch McConnel, okubandla lama Republicans.

Kukhangelelwe ukuthi idale leSenate lizahlafuna udaba lolu omelele ukungena esikhundleni sikamongameli, uMnu. Joseph Biden, esegcotshiwe ukuba ngumkhokheli welizwe leMelika.

Ibandla lama Democrats lithi uTrump watshotshozela udlakela olwenziwa ngabalandeli bakhe eCapitol Hill ngeviki ephelileyo, waqamba amanga esithi waqilwa kukhetho lukamongameli njalo wakhuluma okungekho emthethweni leziphathamandla zesabelo seGeorgia ecela ukuthi bamdingele amavoti angenza ukuthi anqobe uBiden kukhetho.

Okwenziwe ngabakubandla lama Democrats abavotele ukuba uTrump asuswe esikhundleni kusekelwe ngabalitshumi abakubandla lama Republicans, abagoqela uNkosazana Lizzy Chaney, Adam Kizinger labanye abathi uTrump wephule imithetho yelizwe. Abanye nguJohn Katko (New York), Fred Upton (Michigan), Jaime Herrera Beutler (Washington), Dan Newhouse (Washington), Peter Meijer (Michigan), Anthony Gonzalez (Ohio), Tom Rice (South Carolina) loDavid Valadao (California).

Abalandeli baka Trump bangena ngenkani edale leCongress ngoLwesithathu ngeviki ephelileyo befuna ukuba kumiswe ukubalwa kwama electoral votes okhetho olwenziwa ngoLwezi nyakenye. UTrump wayesanda kubatshela ukuba bahambe kuleyo ndawo esithi ilizwe labo laselithathwa ngamandla libandla lama Democrats.

Kubikwa ukuthi abanye abakubandla lama Republicans edale leSenate bafuna ukuba uTrump ajeziswe besithi wephula imithetho yelizwe okuyangisayo.

Bathi kuyethusa ukuba watshotshozela udlakela okwenza bebaleke becatshe edale leCongress ngesikhathi bebala ama-electoral votes.

UTrump ngumongameli wakuqala ukuba athathelwe amanyathelo okususwa esikhundleni lidale leli. Wake wetheswa icala lokuzama ukusebenzisa ilizwe leUkrainne ukuba limcedise ukukhankasela ukhetho olwenziwe ngoLwezi ukuze anqobe uBiden.

Facebook Forum

XS
SM
MD
LG