amalinks wokungena

Breaking News

UJoseph Biden Uthi Kumele Kuvikelwe Umbuso Wakwele Melika Owaphosa Waqanjulwa NguTrump


Capitol Riot Anniversary Biden
Capitol Riot Anniversary Biden

Sokulomnyaka abalandeli baka Mnu. Donald Trump, owayengumongameli wakwele Melika, bazama ukumisa ukubalwa kwama electoral votes edale leCongress lapho abangena khona ngenkani besithi ukhetho aluqhutshwanga ngemfanelo. Lokhu kukhanya kwalulaza isomo sezokhetho kwele Melika.

Ukungena ngenkani eCapitol Hill kwabalandeli baka Trump mhlaka 6 Zibandlela kwalandela umhlangano owenziwa nguTrump labanye bakhe ababesithi ukhetho kaluqhutshwanga ngemfanelo.

Uhulumende kaMongameli Joseph Biden uthi ukhathazekile kakhulu ngokwenzakala nyakenye njengoba uTrump kukhanya waqamba amanga esithi uqilwe libadla lama Democrats njalo uqhubekela phambili etshela abalandeli bakhe amanga la.

UBiden namuhla utshele uzulu ekudale leCongress ukuba kubi kakhulu okwenziwa nguTrump.

UBiden uthi uTrump wazihlalela eWhite House ebona kuhlaselwa idale leCongress.

Uphinde wathi kwenziwa ubutshapha obumangalisayo mhlaka 6 Zibandlela.

UNkosikazi Kamala Harris, umsekeli kamongameli, uthi kwaphose konakala elizweni leMelika.

Kwabhubha amapholisa ambalwa kulandela isehlakalo lesi edale leCongress, kwabotshwa abedlula amakhulu ayisikhombisa – 725.

Abanye babo sebegwetshwe yimthethwandaba kubelabanye abamelele ukuthoniswa amacala atshiyeneyo. Abacubungula ezombusazwe bathi kuyethusa okwenzakala mhlaka 6 Zibandlela njalo akwaziwa ukuba kuzakwenzakalani kukhetho oluzayo kwele Melika.

Kulekhomithi khonamanje ephenya okwenziwa nguTrump labalandeli bakhe. Kulabanye abalandeli baka Trump abangafuni ukwethulela ikhomithi le ubufakazi ngesehlakalo lesi. UMnu. Kuthula Matshazi, ingcwethi kwezombusazwe ezimeleyo uthi kulusizi okwenzakala elizweni leli.

UMatshazi uthi labo abangafuni ukwethulela ikhomithi ehlolisisa isehlakalo lesi kumele bejeziswe.

UMnu. Thabanga Nare, ingcwethi ezimeleyo, ulombono ofanayo. Uthi umkhulu umsebenzi obhekane lele Melika kwezokhetho.

Banengi abathi kuyethusa okwenzakala kwele Melika okuyilo iizwe ilifanele likhokhele ngokuba lohulumende kazulu. Omunye wabo nguMnu. Effie Dlela Ncube, ingcwethi kwezombusazwe ezimeleyo.

UTrump kubikwa ukuba ufisa ukungena kukhetho oluzakwenziwa ngomnyaka ka2024 loba kulabanye abakubandla lakhe abathi lokhu kuzalulaza ukubuswa kwelizwe leli.

UTrump labanye bakhe sebeguqule indlela zokwenziwa ukhetho ezabelweni ezinengi besithi benzela ukuba ukhetho lungatshontshwa libandla lama Democrats. Abazi ngokwenzakala bathi abakwenzileyo kulakho ukwenza ilizwe leMelika libeyinhlekisa ngoba inkokheli yama Republicans alakho ukukhetho abantu ababafunayo hatshi abafunwa nguzulu.

Udaba Esilethulelwe NguGibbs Dube
please wait

No media source currently available

0:00 0:05:39 0:00


XS
SM
MD
LG