UMongameli Donald Trump usebambisana labanye abakudale leCongress ukwenzela ukuthi azame ukuguqula impumela yokhetho olusanda kwenziwa kwele Melik.
UTrump useyenze imihlangano embalwa eWhite House lamanye amalunga eHouse of Representatives abakubandla lakhe lama Republicans.
Okhokhela idale leSenate, uMnu. uMitch McConnell uthi akumelanga abakubandla lakhe baphikise impumela yokhetho lolu sokuhlolisiswa amavoti enziwe yiElectoral College okumele abalwe mhlaka 6 Zibandlela.
UTrump usephanyeke udaba lokhetho emithethwandaba eminengi, okuguqela elikhulu lelizwe eleSupreme Court elisanda kulahla isicele sokuthi kuvinjwe amavoti eGeorgia, Pennyslvania, Michigan leWisconsin lapho athi ukhetho aluqhutshwanga ngemfanelo.
Imithethwandaba ithi akulabufakazi bokuthi ukutho lwebiwa nguMnu. Joseph Biden lebandla lakhe lama Democrats. UBiden ukhangelelwe ukuthi uzangena esikhundleni sikamongameli mhlaka 20 Zibandlela.
Abalandela okwenzakala eMelika, abagoqela uMfundisi Raphael Mthombeni, bathi kukhanya engani kulabanye abantu abathakazelela izenzo zonke zika Trump.
UMthombeni uthi akumangalisi ukuthi kulabantu abanengi abasekela uTrump kukhetho olusanda kwenziwa.
UMnu. Den Moyo, ohlala kwele Melika, uthi uTrump uzasuswa esikhundleni kulandelwa imithetho yelizwe.
Kulabanye abasekeli baka Trump abathi kumele idale leCongress livimbe impumela yokhetho lukamongameli. Bathi uTrump waqilwa libandla lama Democrats. Izabelo zonke eMelika zithi uTrump wanqotshwa nguBiden kukhetho olubalulekileyo.