Ilizwe leMelika lithi lihlutshwa kakhulu yikuthunjwa, ukutshaywa njalo lokuthwaliswa nzima kwenkokheli yenhlanganiso ezizimeleyo eZimbabwe elwela ilungelo loluntu.
Isigodlo seMelika eZimbabwe sethule umbiko lo ngoMgqibelo sisithi akumelanga kukhahlamezwe abalwela uzulu labantu makhaza abakhala ngokutshiyeneyo okugoqela imizamo eyenziwa nguhulumende kaMongameli Robert Mugabe osefuna ukwethula uhlelo lwama bond notes.
Omele isigodlo seMelika eZimbabwe, uAmbassador Harry K. Thomas Jnr. uthe,“Sicela ilizwe leZimbabwe ledingisise konke lokhu okwenzakalayo njalo libone ukuthi ilungelo likazulu lokutshengisela njengalokho okufakwe kusisekelo sombuso welizwe kuyalandelwa ngemfanelo.”
UAmbassador Thomas Jnr. wethule lokhu kulandela ukuthunjwa kuka Mnu. Patson Dzamara, umnewabo kaItai Dzamara oselesikhathi eside wathunjwa eZimbabwe kulandela ukutshengisela kwakhe ezitaladini eHarare efuna ukuthi uMongameli Robert Mugabe asuke esikhundleni.
UAmbassador Thomas Jnr. uthe wethekelele uDzamara esibhedlela seAvenues Clinic ukwenzela ukuvezela eleZimbabwe ukuthi basekela ilungelo likazulu.
UDzamara uthunjwe ngesikhathi elebanye bakhe emadabukakusa ngoLwesihlanu belungisela ukutshengisela ezitaladini bekhonona ngemali yama bond notes.
UAmbassador Thomas Jnr. uthe, “Ilizwe leMelika lihlutshwa kakhulu yikwephulwa kwelungelo likazulu eZimbabwe. Lokhu kugoqela ukukhahlameza abantu abatshengisela ezitaladini, ababona ngezombangazwe labo abethuselwayo kanye labathunjwayo lentathelizindaba ezikhahlamezwa zizama ukwenza umsebenzi. Sihlutshwa njalo yikubotshwa kwabantu mahlayana nje ngesikhathi sibona engani konke lokhu sokumemetheka okumangalisayo elizweni leZimbabwe.
“Esikhathini esinengi abantu laba bayatshaywa bengatholi loncedo ezibhedlela. Abanye bayabotshwa okwesikhathi eside bathwaliswe nzima yilabo ababophileyo kuthi-ke abanye bayathunjwa njengo Itai Dzamara owanyamalala mhlaka 15 ngoMbimbitho. Ukuthunjwa kwakhe labanye lokhe kungadingisiswa ngemfanelo.
“Lokhu okwenzakalayo akuhambelani leziqondiso zemithetho yamazwe omhlaba jikelele.”
Uthe eleMelika lisekela inkululeko enjengokuthi abantu bakukhulume abakufunayo njalo bahlangane lapho abafuna khona ngesikhathi sabo. Ngakho-ke sicela ukuthi eleZimbabwe lihloniphe ilungelo likazulu, lihloniphe leziqondiso zesisekelo sombuso welizwe lalezo ezisetshenziswa emhlabeni jikelele.”
EleMelika lamanye amazwe afakela inkokheli yebandla leZanu PF izijeziso zenotho kulandela ukhetho okuthiwa lwenziwa ngendlela engaqondanga ngomnyaka ka2000 njalo lokwephulwa kwelungelo likazulu nguhulumende.