amalinks wokungena

Breaking News

UNkosazana Thabitha Khumalo Uvunyelwa Ukuhlawula Isibambiso seBail


Umantshi wakoBulawayo eTredgold Magistrate Court, uMnu Tinashe Tashaya, unqume esipha uNkosazana Thabitha Khumalo labanye abotshwe labo ngempelaviki, imvumo yokuthi bahlawule isibambiso sebail samakhulu amabili amadola-$200 ngamunye, kodwa besiyazibika emapholiseni kanye ngeviki.

Bazaphindela emthethwandaba ukuzothonisiswa mhla zintathu ngenyanga ezayo kaMpandula.

UNkosazana Thabitha Khumalo, uNkosazana Senator Helen Mpofu, Tendai Masotsha, uShelton Tembo, Elliot Mujeri, Meliqiniso Sithole loTinashe Matimburi ababotshwe ngoMgqibelo besetheswa icala lokupha abantu amaphetshana okubanxusa ukuthi baze ukuzophatheka ekutshengiseleni obekumele kwenziwe lamhlanje kodwa kwavinjwa ngamapholisa akoBulawayo.

Ingqwetha ebelimele uMaKhumalo labanye, uMnu Godfrey Nyoni owenkampani yamagqwetha eyeMoyo and Nyoni Legal Practitioners emmele njalo abenhlanganiso elwela amalungelo oluntu, eyeZimbabwe Lawyers for Human Rights uchaza okwenzakeleyo.

''UHon Thabitha Khumalo labanye bakhe bahlawuliswe ibail ye$200 munye ngamunye njalo baye emapholiseni kanye ngeviki NgoLwesihlanu njalo baphenguke edale ukuzothonisiswa mhla zintathu NgoMpandula.''

Kusenjalo, emthethwandaba munye uMantshi Tashaya ulahlile isicelo sokuphikisa ukuvinjwa ukutshengisela obekuqoqwe ngabebandla leMDC elikhokhelwa nguMnu. Nelson Chamisa, obekusitsho ukuba usekela umbono wamapholisa ukuthi lokhu kutshengisela kungabi khona.

UAdvocate Perpetua Dube obemele Imdc owenkampani yamagqwetha eyeTanaka Law Chambers uchaza okwenzakale edale.

''Umantshi lamhlanje ulahlile isicelo sokuba ibandla leMDC-A siphathe uhlelo lokutshengisa edolobheni kungelandleko''

Kusenjalo, uMnu Dumisani Dube weMathonsi and Ncube Law Chambers uphanyeke udaba lokubotshwa kukaNduna Nhlanhlayamangwe Ndiweni edale leHigh Court.

''Lamhlanje siphanyeke incwadi edale leHigh Court KoBulawayo ukuba uNduna uNdiweni aphenduke edale azobhalela imali yesibambiso ibail elinde ukuthi aphikisane lesigwebo sakhe singangena edale lamhlanje kumbe kusasa''

Umthethwandaba kaMantshi Tashaya utshone uphithizela ngoMvulo, abantu bengena lokuphuma ikakhulu abalendaba ezimbalwa eziphathelane lenkokheli zebandla eliphikisayo eleMDC.

Umsekeli kaMayor wedolobho lakoBulawayo, uKhansila Tinashe Kambarami loKhansila uSilas Chigora bekumele baze edale kodwa abasabuyanga ukuzothonisiswa ngodaba lwabo lokulwa loMabhalane omkhulu wekhansili, uTown Clerk, uMnu Christopher Dube.

Umthethwandaba ubikwa uhle waloba amasamanisi wokubabopha.

Kusenjalo, owayengumsekeli kamongameli, uAmbassador Mphelekezela Mphoko, lamhlanje ubotshwe ngabekhomishini eyeZimbabwe Anti Corruption Commission kodwa waphunyuka wenelisa ukubabalekela lapho efunyenwe elendodana yakhe uSiqokoqela Mphoko phandle komthethwandaba kaMantshi eTredgold. Umthethwandaba uhle wanquma ukulotshwa kwamasamanisi okumbopha.

Icala lakhe alikacaci ukuba ngelani kodwa uKhomishina John Makamure usekhuphe imibiko ethi uAmb. Mphoko uyadingwa ubaleke ngemva kokubotshwa ngamapholisa eZACC lobanje engachazanga ukuba ubotshelwani.

please wait

No media source currently available

0:00 0:04:23 0:00
XS
SM
MD
LG