Abantu abakhulileyo labaphila lobugoga koBulawayo ngoLwesithathu bahlangane loNkosikazi Auxilia Mnangagwa phandle kwenkonzo yeHarvest House International Church.
UNkosikazi Mnangagwa utshele uBulawayo ukuba uyajabula ngokuba Sedolobheni leli. Uphathele abantu itshukela, ingubo lerice okwabelwe abakhulileyo labaphila lobugoga wathembisa ukuba usazophilisana kuhle loBulawayo.
"Ngize lapha ukuzogcwalisa isithembiso sokuthi ngizaphenduka, njalo ngiyajabula lingamukele kuhle kodwa lamhlanje ngiliphathele okuncane elizasala likwabelana kuhle angisoke ngilikhohlwe Bulawayo omuhle".
UGogo Magret Moyo ohlala eLobengula West ujabule ngesipho asithole kuNkosikazi Mnangagwa esetshukela, irice lengubo eyodwa.
"Ngibonga uNkosikazi Mnangagwa ngesipho setshukela ingubo lobhayi lwengubo ngiyabonga sibili".
Ophila lobugoga, uMnu. Elijah Moyo, uthe uthokoze kakhulu ngokuhlangana loNkosikazi Mnangagwa.
"Sijabule ukuhlangana sibanengi kangaka kodwa udubo akukhanyi ukuthi kupheni njalo sesiside isikhathi siphilanzima".
Esinye isakhamuzi sakoBulawayo ebesikulumhlangano, uNkosikazi Siphiwe Ngwenya, uthe kasuthiseki ngesiphatho sikahulumende ngabe uhulumende uyaguqulwa.
"Thina esiphila lobugoga siphilanzima uhulumende lokhe sathatha uzibuse kasinakekeli nabe kuyaguqulwa uhulumende mhlawumbe kungabanganeno".
UNkosikazi Juliana Nkiwane, ohlala eMakhandeni, uthi uyajabula ukuhlangana loNkosikazi Mnangagwa kodwa uphila nzima.
"Mina ngiphilanzima, ngigcine intandane ngilesikwelede kukhansili ngiyajabula ukuhlangana lomama ngokhangelele ukubuyela endlini letshukela lokho".
Inengi labantu abaphila lobugoga bajabule ukuhlangana loNkosikazi Mnangagwa kodwa inengi labo belikhala ngokuswela, indlala lokungaphatheki bethi bakhangelele ukuba ibandla elibusayo linganqoba bathole ukugcinwa kahle ngoba okwamanje uhulumende kabanakekeli.