amalinks wokungena

Breaking News

Umdlali weNguqu Owadhuma Ngama Nineties uNqobizitha Maenzanise Kasekho


Nqobizitha Maenzanise
Umdlali wenguqu owadlalela amaqembu agoqela iHighlanders, iZimbabwe Saints, iAmaZulu kanye leqembu lesizwe elama Warriors uNqobizitha Maenzanise ubhubhe namhla ekuseni esibhedlela seMpilo lapho abelaliswe khona kumaviki amabili edluleyo.

UMaenzanise, obesaziwa ngegama lokusoma elithi Humpty Dumpty loba elithi Jackal, udlule emhlabeni ngoMvulo ekuseni ngemva kokugula okwensuku ezimbalwa.

Lumdlali uqale ukwaziwa ngomnyaka ka 1987 lapho aba yingxenye yeqembu labaleminyaka engaphansi kwelitshumi lathoba munwe munye eleqembu le Highlanders elaphatheka kumidlalo ye Aberdeen Youth Football Festival elizweni lase Scotland lapho elenza khona izimanga laphenduka liphethe izicoco ezinengi.

Uqalise ukudlala kuqembu leHighlanders elabadala ngomnyaka ka 1987 njalo udlale okweminyaka emibili wasesiya kuqembu le Zimbabwe Saints ngenxa yokungezwani lowayengumqeqetshi weqembu le Highlanders ngalesosikhathi uRoy Barreto.

Udlale kuqembu le Zimbabwe Siants kwaze kwafika umnyaka ka 1991 lapho abhekise khona amabombo elizweni le South Africa lapho adlalela khona amaqembu agoqela ele D’Alberton Callies kanye le Royal Tigers.

UMaenzanise uphenduke eZimbabwe wazodlalela iqembu leAmaZulu ngomnyaka ka 1996 njalo udlale kulelo qembu waze watshiya ukudlala umdlalo wenguqu.

Lumdlali ubesaziwa njengomdlali ongelambeko ebutsheni bakhe okudale ukuba aze adlale kuqembu lesizwe esele minyaka efika phose ngamatshumi amathathu njalo uke waba ngukaputeni weqembu lama Warriors ngesikhathi liqeqetshwa ngu Marc Duvillard.

Sikhangele umdlalo kakhilikithi:

Iqembu labaleminyaka engaphansi kwelitshumi lathoba minwe mbili elimela ilizwe le Zimbabwe emdlalweni kakhilikithi kuzamele linqobe iqembu labosowabo elimela ilizwe le South Africa emdlalweni walo owokucina owezibaya ukuze lithuthukise amathuba alo okudlulela kusigaba esilandelayo esomncintiswano wezizwe zomhlaba oqhutshelwa elizweni le United Arab Emirates kulezinsuku.

IZimbabwe itshaywe ngama runs angu 167 liqembu le West Indies ngeNsonto edluleyo emdlalweni wayo wesibili okutsho ukuba sekuzamele itshaye iSouth Africa kusasa njalo ithandazele ukuba iqembu le Canada linqobe ele West Indies ukuze idlulele kusigaba esilandelayo esomncintiswano.

Ukudliwa kweZimbabwe liqembu le West Indies kuyitshiye ikundawo yesithathu engalaneni yemiklomelo kusigaba sika Group C ilemiklomelo emibili ngemva kwemidlalo emibili.
XS
SM
MD
LG