Umkhokheli wesonto yeRoma uPapa Francis ukhulume phambi kwabakhokheli bamazwe omhlaba emhlanganweni weUN General Assembly ngoLwesihlanu wakhuthaza abakhokheli laba ukuthi baqede izimpi, ubuyanga lokuhlukuluzwa kwamakholwa esiChristu emazweni angenhla yeAfrica lodlakela emazweni aseMiddle East.
UPapa Francis wethule amazwi la ngemva kokhukhuluma phambi kwedale lephalamende leMelika eleCongress ngoLwesine.
UMongameli Robert Mugabe ngomunye wabakhokheli abalande umhlangano weUnited Nations eNew York abalalele amazwi kaPapa yena okhuthaze njalo abakhokheli bamazwe ukuthi balwisane lokuguquka komkhathi ngoba kungalungelanga impilakahle kazulu.
Esuka emhlanganweni lo, uqhube umkhuleko labakhokheli benkolo ezitshiyeneyo eGround Zero lapho okwafela khona inkulungwane zabantu ngo2001 kungozi yendizamtshina ezazithunjwe ngabahlamuki beqembu leAl Qaida.
Ingcwethi kwezombusazwe uMnu Nkululeko Sibanda uthi aqakathekile kakhulu amazwi kaPapa njalo abakhokheli bamazwe omhlaba kumele bawalandele.
"Ngibona angani uPope Francis ukhulume konke ekade sikukhangelele okugoqela udaba lokuthi abantu kumele bazame ukuphilisana kuhle," kutsho uSibanda.
"Ngumbiko emuhle kakhulu ovela kuPapa othandwa kakhulu njalo ngabantu abanengi."
