amalinks wokungena

Breaking News

UMnu. Paul Siwela Ubaleka eZimbabwe Ngoba Esith Uyethuselwa Ukubulawa


Paul Siwela
Ibandla le Matabeleland Liberation Organisation, lethesa uhulumende weZimbabwe umlandu wokwethusela ukubulala umkhokheli walo umnumnzana Paul Siwela, lisithi lokhu yikho okuze kwabangela ukuthi abaleke elizweni ukuze avikele impilo yakhe. Isikhulumeli saleli bandla umnumnzana Busani Sibanda, uthi uSiwela uzimisele ukubuyela eZimbabwe ukuyabhekana lamacala awetheswayo okuzama ukuhluthuna intambo zombuso ngodlakela kodwa lokhu uzakwenza kuphela kungaba lesiqiniseko sokuthi impilo yakhe izavikelwa ngokugcweleyo.

NgoNgcwabakazi lonyaka umnumnzana Paul Siwela ubhalele umthethwandaba weZimbabwe incwadi ewazisa ukuthi usebalekele phandle kwelizwe ngemva kokwesabela ukuthi impilo yakhe isengozini.

USiwela lomnumnzana Charles Thomas babhekane lecala lokuzama ukuthatha intambo zombuso ngodlakela ngemva kokutholakala besipha uzulu amaphetshana acatshangelwa ukuthi ayekhuthaza lokho.

Umnumnzana John Gazi owayebhekane lecala elifanayo ukhululwe kuleli cala kunsukwana ezedluleyo. Ekuqaleni kukaMpalakazi linyanga umthethwandaba ukhiphe ugwalo lokuthi uSiwela adingwe njalo abotshwe lapho engabonakala njengoba ehlulekile ukuza emthethwandaba.

Lobanje icala eletheswa uSiwela ubikwa elidale esebenzela ibandla le Matabeleland Liberation Front (MLF). Ibandla le Matabeleland Liberation Organisation (MLO), elithi uSiwela ngumkhokheli walo, lethesa inhloli zikahulumende weZimbabwe umlandu wokwethusela lokuzama ukubulala uSiwela, okucine kusenza ukuthi abaleke elizweni.

Isikhulumeli se MLO umnumnzana Busani Sibanda uthi uhulumende we Zimbabwe wazimhlophe ukuthi kungani uSiwela ebaleke elizweni.

Ilunga lalelibandla umnumnzana Israel Dube uthi kakulula ukuthi kufike abantu amzini wakho befuna ukukubulala baphinde bakufonele bese kuthiwa qinisela ngoba usabhekane lamacala emthethwandaba.

USibanda uthi uSiwela okwamanje usendaweni ephephileyo, njalo angafuni kuyiveza. Uthi kakusilo qiniso ukuthi uSiwela ubalekele icala abhekane lalo eZimbabwe.

UDube uthi njengabantu beMandebeleni bayakhathazeka ngokuhlukuluzwa kwalabo abazama ukusukuma bakhulumele isizwe sikaMthwakazi.

Ibandla le Matabeleland Liberation Organisation lithi kalithandabuzi ukuthi ngo 2018, uSiwela uzasikhulula isizwe sikaMzilikazi sithole ukuzibusa okugcweleyo.
XS
SM
MD
LG