Endabeni eziphuma emithethwandaba............ uMahluli wedale laphezulu eleHigh Court uthi uzakupha isinqumo ngoLwesihlanu sokuba intathelizindaba elodumo, uHopewell Chin’ono aphiwe imvumo yokuhlawulela isibambiso sebail na, loba hatshi.
UChin’ono wetheswa icala lokweyisa imithethwandaba yeZimbabwe ngokubhala enkundleni yeTwitter esola indlela ephatha ngayo amacala okugoqela elika mgcinisinisihlalo wenhlanganiso yabemigodi, eye Zimbabwe Small Miners Federation, uHenrietta Rushwaya, owabanjwa elegolide elilesisindo samakilogram ayisithupha esikhwameni sakhe, esilindweni sendizamtshina eseRobert Gabriel Mugabe International Airport.
Kunjalo nje, UMongameli Emmerson Mnangagwa ubeke okusemthethweni iqula labahluleli abathathu abazaxwayisisa udaba lokukhitshwa esikhundleni kukaJustice Erica Ndewere owetheswa icala lokusebenza ephambana leziqondiso zomsebenzi wakhe wokuba nguMahluli.
Umgcinisihlalo wequla leli ngu Justice Simbi Mubako, owake waba ngumpathintambo wezemithetho, waba njalo ngummeli weZimbabwe kweleMelika. Abanye abakuleli qula ngamagqwetha uMnu Charles Warara lo Nkosazana Yvonne Masvora.
UMahluli uNdewere uyalilandula icala lakhe esithi ufuna ukuphazamiswa umsebenzi ngenxa yokwahlulela okusemthethweni.