Lokhu kuxokozela kukhetho lweMelika lobanje kusobala ukuba uMnu. Joseph Biden webandla lama Democrats wanqoba uMnu. Donald Trump othi waqilwa kukhetho lukamongameli olusanda kwenziwa.
UTrump uqhubekela phambili esithi waqilwa kukhetho lukamongameli ngesikhathi idale leSupreme Court esabelweni sePennyslvania lisanda kulahla udaba aluphanyeke kulo esithi amavoti awenziwa ngeposo kawakho emthethweni.
Umthethwandaba lo uthi akubonakali okukhulunywa nguTrump labanye bakhe abakubandla lama Republicans abathi ukhetho lwebiwa ngama Democrats. Isabelo seWisconsin laso sisanda kubala amavoti okuveza ukuba uBiden wanqoba uTrump ngamavoti amanengi.
UTrump uthi kuzakuba nzima ukuba avume ukuthi wanqotshwa nguBiden. Usanda kutshele umsakazo weFox News ukuba ibandla lama Democrats labambisana lenhlangothi zikahulumende wakhe ezomvikela baphekapheka impumela yokhetho lukamongameli.
Abazi ngokwenzakalayo bathi wayeqinisile uMnu. Chris Krebs, owaxotshwa kuhlangothi olweCybersecurity, owathi ukhetho lukamongameli lwalubalulekile okwedlula yonke iminyaka.
Bathi uTrump useselwa okokukhuluma ngoba akulabufakazi akukhulumayo. Abalandeli bakhe abanengi bayamsekela lobanje bengazi lutho ngakukhulumayo.
Kulabanye abantu abathi okwenziwa nguTrump kuveza ukuthi ukungadlelani kwakhe labamphikisayo kanye lokungavimbi iCOVID-19 ngemfanelo yikho okwamlahla phansi.
UMnu. Cassius Jays Mpofu, odabuka eZimbabwe othanda ezombangazwe, uthi kunengi kakhulu okuhlupha uTrump.
UMnu. Aleck Nyathi, ohlala eTshalimbe eKezi esabelweni seMatabeleland South, uyakusekela lokhu.
UMnu. Joseph Mageza uthi kuyamangalisa okwenziwa nguTrump, okukhanya
Kodwa uMnu. Sikhumbuzo Mlalazi, olandela kakhulu okwenzakala eMelika, uthi kunengi okwenziwa nguTrump.
Okwamanje, akucaci ukuba uTrump uzakuya eCapitol Hill ngoZibandlela ngesikhathi kugcotshwa uBiden ukuba ngumongameli.
UBiden usekhethe abanye abantu abazangena kudale leCabinet yakhe njalo labazabona ngokwethulwa kwemibiko kahulumende. Inengi labo ngabesifazana.