Kwezemidlalo ngoLwesithathu sixoxe lomdlali weqembu elimela isizwe emdlalweni wenguqu uMarvelous Nakamba okhulume phezu kokudlala kwakhe kusigaba saphezulu elizweni lase Holland.
Imidlalo yenguqu eyaqalisa ngomyaka ka 2016 kulelolizwe isanda kuphela. Uqolotshe okwamagama uNakamba odlalela iqembu le Vitesse Arnhem.
Lumdlali, oleminyaka engamatshumi amabili lantathu eyokuzalwa, ukhethwe ngabalandeli beqembu le Vitesse Arnhem njengomdlali wesibili kuluhlu lwabadlali abadlale kahle kusizini ephelileyo ngemva kokuba ephathise leliqembu ukuba liphutshe imidlalo yalo lisendaweni yesihlanu engalaneni yemiklomelo.
UNakamba uthi yebo kambe uyakuthakazelela ukuba abalandeli bayakunanzelela ukuba ubeqhuba kuhle kodwa okumjabulisa kakhulu yikuba iqembu lakhe lenelise ukuphakamisa inkezo ye Dutch Cup okwakuqala selokhu lathwetshulwa yingwe ngomnyaka ka 1892.
“Ngiyajabula ukuba ngakhethwa ukuba endaweni yesibili kuluhlu lwabadlali abadlale kuhle kuqembu lami kodwa okuqakathekileyo kimi yikuba senelise ukuphakamisa inkezo. Kodwa lokhu ngilethemba elokuba lami ngomunye umnyaka nxa ngingaqhubeka ngidlala kuhle ngizakhethwa ukuba ngumdlali odlale kuhle okwedlula abanye.”
UNakamba yindodana kanozinti owayebambela iqembu le Hwange, uAnthony Nakamba, njalo uqale ukudlala kusigaba saphezulu esenguqu kuleli ese Premier Soccer League eleminyaka elitshumi lanhlanu njalo edlalela iqembu leBantu Rovers.
Iqembu leBantu Rovers liqhubekela phambili lisipha ithuba abafana abancane njalo uNakamba ukhuthaze abadlali laba abasakhulayo ukuba besebenzise ithuba abaliphiwa yileliqembu.
“Abafana abancane laba abasakhulayo kumele babe lokuzikholwa njalo lokuzithemba njalo kuqakathekile ukuthi besebenze ndawonye njengeqembu ngoba bengenelisa ukuveza ikhono labo balakho ukufika khatshana ngalo umdlalo wenguqu.”
Okwamanje uNakamba uyingxenye yeqembu lesizwe elilungiselela ukudibana leqembu le Liberia emdlalweni wakuqala kumkhankaso wokudinga amaqembu azakuyadlala kumidlalo ye Africa Cup of Nations.
Iqembu leZimbabwe lele Liberia akusibaya sika Group G ndawonye le Democratic Republic of Congo kanye le Congo Brazzaville.
