UMongameli weleSouth Africa uMnu Cyril Ramaphosa izolo uchothoze amazwe agoqela eleMelika leleBhilithani phezu kokuvimba izethekeli ezivela elizweni lakhe lamanye asezansi yeAfrica afana leZimbabwe, iBotswana, iNamibia lamanye kulandela ukuqhamuka komkhakha weCovid-19 omutsha obizwa ngokuthi yiOmicron.
Emazwini awethule kumabonakude, uRamaphosa uthe ukuvimba izethekeli lezi akusoze kwenqabele ukumemetheka kwalumkhakha.
Ngokunjalo, uthe kumele amazwe la esule iziqondiso lesi evumele abantu bahambe bekhululekile.
Wengeze wathi lanxa umkhakha lo usutholakele elizweni lakhe, eleSouth Africa lizaqhubeka likuzinga lakuqala lokwenqabela lumkhuhlane, i-lockdown level 1 okwamanje, okutsho ukuthi alisoze liqinise lezo ziqondiso.
Kodwa uxwayise uzulu ukuthi eqaphele njalo labangakahlatshwa ijekiseni yeCovid-19 uthe kumele bayehlatshwe.
Umphathintambo wezempilakahle eZimbabwe uMnu Constantino Chiwenga yena uthi lanxa umkhakha weOmicron ungakatholakali kulelilizwe, uhulumende usadingisisa ukuthi usukhona na elizweni kumbe hatshi.
Umqondisi wenhlanganiso yeCitizens Covid-19 Monitor uMnu Effie Dlela Ncube utshele iStudio 7 ukuthi amazwe wonke kumele ebambisane ekulwisaneni lomkhakha omusha lo.
