Uhulumende weleSouth Africa ngoMvulo uthumele amabutho ezitaladeni ukuyazama ukuqeda udlakela kanye lokuntshontshwa kwempahla okuqhubekayo ezitolo.
Udlakela lolu luqalwe ngabasekeli bakaMnu Jacob Zuma ngeviki edluleyo lapho abatshise khona izimota kwaZulu Natal njalo badiliza impahla engena kuzigidi zamaRand besithi bafuna uZuma akhululwe ejele.
Udlakela lolu solufinyelele endaweni ezitshiyeneyo zelizwe ezigoqela esabelweni seGauteng lapho inkulungwane zabantu ezigqekeze khona ezitolo eziseJabulani Shopping Mall, eSoweto, ngoMvulo zantshontsha impahla egoqela amafriji, omabonakude, ukudla, izigqoko lokunye.
Umsakazo weSABC ubike ukuba indawo ezinengi eJohannesburg bezivaliwe ngendla yodlame lolu.
Lusiyaphambili loludlakela, umthethwandaba weConstitutional Court, oyiwo owagweba uZuma ukuthi apike okomnyaka olenyanga ezintathu, ubuhluza isicelo sakhe sokuthi isigwebo lesi sibekwe eceleni njalo ekhululwe.
UMongameli Cyril Ramaphasa usole okwenzakalayo lokhu ngeSonto esithi kuphehlwa ngabantu bomhlobo kaZuma.
Olwela amalungelo oluntu oseSouth Africa uMnu Mthulisi Hanana utshele iStudio 7 ukuthi uRamaphosa uyehluleka ukuluphatha kuhle loludaba.