amalinks wokungena

Breaking News

UTrump Uzangqikilana loBiden Kungxoxo Mpikiswano Yokhetho Lukamongameli


UMongameli Donald Trump loMnu. Joe Biden

Kulengxoxo mpikiswano yokucina phakathi kuka Mongameli Donald Trump loMnu. Joe Biden namuhla kusihlwa ekhangelelwe ukuthi ngeyokukhanga ukuba bavotelwe yilabo abantu abalokhu bengakakhetho abazamvotela.

Ingxoxo mpikiswano le, eyenzelwa eBelmont University eNashville, Tennessee, bekumele ibengeyesithathu phakathi kwababii laba abazavotelwa mhlaka 3 ngoLwezi.

Kungxoxo mpikiswano yakuqala, abantu abanengi bayisola kakhulu besithi kabazwanga lutho ngoba uTrump kukhanya wayethwalele uBiden ubhulo njengoba wayengenela sonke isikhathi nxa uBiden ekhuluma.

Kwakumele bangqikilane kungxoxo mpikiswano yesibili kodwa iCommission on Presidential Debates yatshelwa ngabasekela uTrump, owayesanda kuhlolwa watholakala elegciwane leCOVID-19, ukuthi kasoze ephatheke kuyo kusetshenziswa inkundla zokuxhumana.

Namuhla kukhangelelwe ukuthi ikhomishini le izavimba lowo ozabezama ukukhuluma isikhathi sakhe singakafiki.

Okuzakhulunywa kugxoxo mpikiswano lo kugoqela ubudlelwano belizwe leMelika lamanye amazwe, umkhuhlane weCOVID-19, ukudingwa kwalowo ozangena kudale leSupreme Court, uNkosikazi Amy Coney Barrett, lokunye.

Abalandela okwenzakala kukhehto lolu bathi zindala zombili. UMnu. Busani Mbuso Ntini, odabuka eZimbabwe ozavota kukhetho lolu, uthi kunengi okuzaxoxwa ngababili laba.

Omunye njalo olandela okwenzakala kukhetho lolu, uNkosikazi Priscilla Ndlovu, uthi abantu bayimelele kakhulu ingxoxo mpikiswano le. Uthi uTrump uzazama ukukhulela uBiden.

Abantu abedlula izigidi ezingamatshumi amane – 41 million sebevotile kukhetho lolu kuthi njalo abanye kukhanya bazavota ngosuku lokhetho. UMnu. Ntini uthi bakhona abangakacabangi kahle ngokuvota kukhetho lolu.

UNkosikazi Ndlovu uyakusekela lokhu esithi balamanga abathi kabakacabangi kahle ngokhetho lolu.

Ukhetho lweMelika lwenziwa ngesikhathi kulabanti abedlula inkulungwane ezingamakhulu amabili – 221,000 asebebulelwe yiCOVID-19 elizweni.

UTrump Ungqikilana loBiden Kungxoxo Mpikiswano
please wait

No media source currently available

0:00 0:04:27 0:00


Facebook Forum

XS
SM
MD
LG