Uhlelo lukaMongameli weMelika uMnu Joe Biden olujonge ukuthuthukisa umnotho phansi kwesikhwama esibizwa ngokuthi yiBuild Back Better lukhanya soluphelelwe ngumphako ngemva kokuba ilunga lebandla likaBiden, elamaDemocrats, uSenator Joe Manchin oweWest Virginia ephumele egcekeni ngeSonto wazisa ukuthi akaseyikulusekela loluhlelo.
Lokhu kutsho ukuthi amaDemocrats kaselandlela yokupasisa lesisikhwama edale leSenate ngoba lelibandla lingelawo amanani adingakalayo.
Lanxa ebikwa ebethembise uBiden ukuthi ulakho ukuvotela isikhwama lesi nxa kungehliswa imali yaso ephose ingena kuUS$2 trillion, uManchin utshele umsakazo weFox News ukuthi usesukile lapho njalo akulandlela anagavotela ngayo loluhlelo.
Le yinto esolwe kakhulu yisikhulumeli sikahulumende kaBiden uJen Psaki esithi uManchin wephule isithembiso asenza kuBiden lakumalunga ebandla lakhe.
Ocubungula ezombusazwe njalo esekela amaDemocrats uMnu Den Moyo uthi lelibandla likho ukunqotshwa kukhetho lwamalunga ephalamende ngomnyaka ozayo nxa lingehluleka ukupasisa lesisikhwama.
