Omela abadlali benguqu uGeorge Deda usethuthele elizweni lase Tanzania ukuze adingele kuhle abadlali bakwele Zimbabwe imisebenzi.
UDeda uthi abadlali kanye lamaqembu awenguqu bangasizakala kakhulu nxa abadlali baseZimbabwe bengathola amaqembu awokudlalela ngasempumalanga kanye lasenzikini yezwekazi lase Africa njengoba kwele Zimbabwe umdlalo wenguqu umiswe ngumkhuhlane we Covid - 19.
“Siphathisa abadlali lamaqembu singapha ngoba nxa singatholela abadlali imisebenzi lapha okulokhu kudlalwa khona umdlalo wenguqu balakho ukubhadalwa iholo labo kungamadola aseMelika.
Lokhu kuzaphathisa abadlali ukuba banakekele imuli zabo ikanti amaqembu lawo ayathola imali zokusebenzisa mihla ngemihla ukuze inhlelo zabo zingafadalali,” kutsho uDeda.
Imidlalo yeligi kwele Zimbabwe icine ukudlalwa ngomnyaka ka 2019 njalo iqembu le FC Platinum yilo eliphethe isicoco.
Inhlanganiso ye Zimbabwe Football Association ibikhuphe umbiko ekupheleni kwanyakenye ukuba imidlalo yalonyaka eyeligi kumele iqale ngenyanga kaMbimbitho kodwa lokhu akusafezeki ngemva kokuba umkhuhlane we Covid – 19 usuke wamemetheka njalo.
Ngalokho ke uDeda uthi kungcono ukuba amaqembu akwele Zimbabwe asisele amaqembu akwamanye amazwe abadlali kulokuba babe belokhu behlezi bengenzi lutho.
“Ukusa abadlali emasisweni kulakho ukutholisa amaqembu imadlana eyokuthi babhadale labo abadlali abazabe besele ekhaya ngoba sonke siyakwazi ukuba inengi lamaqembu omdlalo wenguqu kwele Zimbabwe adonsa nzima.
Ngalokho ke kungcono ukuba abadlali babuye ngapha bazitholele okuyimadlana okokuthi baphathiseke kulokuba batshone behlezi abanye babo bacine sebebhema lokunatha izidakamizwa,” kutsho uDeda.
Abanye babadlali abaphathiswe nguDeda ukuba bathole amaqembu awokudlalela kwamanye amazwe ngababalisa uPerfect Chikwende, uPrince Dube, uLast Jesi, uBruce Kangwa, uTendai Ndoro kanye labanye.
