amalinks wokungena

UCallisto Pasuwa Usetshiyile Umsebenzi Weqembu Lama Warriors

  • Gibbs Dube

Umqeqetshi weqembu lenguqu lelizwe leZimbabwe elama Warriors, uCallisto Pasuwa, usetshiyile umsebenzi.

Lokhu kulandela ukunqotshwa kweqembu lama Warriors okuyangisayo yiTunisia leSenegal emdlalweni weAfrica Cup of Nations oqhubekela phambili kwele Gabon.

UPasuwa utshele iphephandaba leHerald ukuthi kumephule inhliziyo okwenzakale eGabon lapho iqembu lakhe elenelisa ukubangutshiki lobhanqa emdlalweni wesihonqo seGroup B leAlgeria.

Besekusele amaviki amalutshwana ukuba umsebenzi wakhe uphele.

Kodwa-ke iphephandaba leNewsDay libika ukuthi uPasuwa uthi kayindawo ngoba inhlanganiso yenguqu yelizwe eye Zimbabwe Football Association yiyo okumele itsho ukuba umsebenzi wakhe umi njani.

Kasenelisanga ukukhuluma loPasuwa ngodaba lolu.

Kusenjalo, kubelokuxokozela edale lephalamende ngoLwesithathu kulabanye akade besithi uPasuwa kumele axotshwe umsebenzi.

Amanye amalunga edale leli athe kumele amajaha akade eseGabon abanjwe ngamandla ukuthi abhadale yonke imali abayinikwe yiZIFA.

Ukhona njalo othe abadlali laba kumele bavalelwe entilongweni kumbe basebenzele uzulu ngesenzo sabo esibi abasenze eGabon.

UMphathantambo wezemidlalo, uMnu. Makhosini Hlongwane, uxolise uzulu ngokwehlele iqembu lenguqu lesizwe esithi kuyadanisa ukubona abantu bedaniswe yikwehluleka kwama Warriors.

Kukhanya ukuthi abantu abanengi eZimbabwe bathi uPasuwa kumele atshiye umsebenzi.

Lokhu kuphume ekuthatshweni kwembono kazulu okwenziwe kukhasi leVOA Studio 7 Twitter.

Abantu abayisilinganiso sokungamatshumi amahlanu lambili ekhulwini (52%) bathe sokumele uPasuwa atshiye umsebenzi.

Abayisilinganiso sokungamatshumi amane lane ekhulwini (44%) bathi kumele aqhubekele phambili ngomsebenzi wakhe.

Kwathi-ke abayisilinganiso sokune ekhulwini (4%) bathe kabakwazi ukuthi kumele enzenjani uPasuwa.

Facebook Forum

XS
SM
MD
LG