Sokuqhamuke ukufuthelana lokuxokozela okwesabekayo ebandleni elithiwa lisekelwa nguMnu. Robert Mugabe ele National Patriotic Front – NPF kulandela ukungezwani kwenkokeli.
Umgcinisihlalo webandla, uNkosikazi Eunice Sandi Moyo, uthi sebexotshe umsebenzi obesaphethe isikhundla sokuba ngumkhokheli uMnu. Ambrose Mutinhiri ngenxa yokungaqhubi kuhle umsebenzi.
Lokhu kuphume emhlanganweni lentathelizindaba owenzelwe e Media Centre, eHarare lapho umgcinisihlalo uNkosikazi Moyo abika ukuba nguye osaphethe isikhundla sokukhokhela leli bandla okwamanje.
Kodwa abelinye icele le NPF elikhokhelwa ngu Mutinhiri, baphange benza umhlangano lentathelizindaba besithi umka owayengumongameli welizwe uNkosikazi Grace Mugabe nguye otshotshozela ukuthi lingene kumanyano wamabandla aphikisayo owe MDC Alliance.
Unkosikazi Moyo ulandise okwenze bathatha inyathelo lokuxotsha u Mtinhiri.
Uthi kunje izigaba eziyisikhombisa sezitshengise ukuba azijabuleli okwenziwa ngu Mtinhiri.
Ukuhlaziya loludaba sixoxe loMnu. Walter Nsununguli Mbongolwane.
Kodwa abecele elisele likhokhelwa nguMtinhiri bathi ngumbedo okukhulunywa ngabecele likaMoyo besithi abathi sebexotshe uMutinhiri yibo asebezixotshe ebandleni.
Abakhokhelwa ngu Mutinhiri bathi kabalani lokungena kwabecele eselikhokhelwa ngunkosikazi Sandi Moyo kumanyano we MDC – Alliance okuthiwa bazakwenza, njengoba beke babonakala bebambisana labe MDC Alliance betshengisela.
UMtinhiri utshele intathelizindaba ukuba okwamanje bangeke bangena kumanyano weMDC Alliance bengakaxoxisani labalandeli beNPF.
Waxwayisa abe MDC – Alliance ukuba ukubavumela ukungena kumanyano kuzobadalela inkinga ngoba besetshenziswa ngu Nkosikazi Grace Mugabe.
Umgcinisihlalo wecele leNPF elikhokhelwa ngu Mtinhiri esigabeni se Matebeleland South, umnumzana Johnson Langa, uthi yikuziyenga okwenziwa ngelinye icele.
Usola abakhokhela kulokhu kuxabana u Langa ethi ngoba kungalilungelanga ibandla.
Isikhulumeli somanyano we MDC Alliance, engumkhokheli webandla le MDC, u Proffessor Welshman Ncube uthi bona bayemukela ukusebenzisana lawo wonke amabandla ezombusazwe afuna ukungena kulumanyano.
Ukuhlaziya loludaba sixoxe lengcwethi ecubungula ezombusazwe, uMnu. Walter Nsununguli Mbongolwane.