amalinks wokungena

Breaking News

Usibalukhulu Omutsha weBhanga Lesizwe, iRBZ, uDr John Mangudya Uqala Umsebenzi


Usibalukhulu weRBZ, uDr John Mangudya
Usibalukhulu weRBZ, uDr John Mangudya

Usibalukhulu omutsha webhanga lesizwe, iReserve Bank of Zimbabwe, uDr John Mangudya uqale umsebenzi ngoLwesihlanu ngesikhathi ilizwe libhekane lenkinga ezithile kwezenotho osokwenze ezinye ingcitshi zithi alivalwe lelibhanga ngoba lingaselawo umsebenzi nanku lokhu kungela nguquko kwezomnotho njalo ilizwe liqhubeka lisebenzisa imali yakwamanye amazwe.

UDokotela John Mangudya ukhethwe kulesi sikhundla ngoMbimbitho lonyaka kulandela ukutshiya umsebenzi kukaDokotela Gideon Gono ngoLwezi nyakenye ngemva kokuphatha lesisikhundla okweminyaka elitshumi.

Uqala umsebenzi uDokotela Mangudya ngesikhathi ibhanga leli lithwele nzima ukuzama ukubhadala izikwelede zelizwe ezicatshangelwa ukuba phezu kwebillion yamadola, ilizwe lisehluleka ukukhanga osomabhizimisi bakwamanye amazwe njalo kusetshenziswa imihlobo etshiyeneyo yemali yakwamanye amazwe.

Bayamutsho kwezenotho ukuthi ngempela uyingcitshi uMangudya njalo elakho ukuvuselela inotho yelizwe ngemva kokusebenza okweminyaka ephethe elinye lamabhanga akuleli iCBZ.

Umsebenzi webhanga leli yikulungisa imithetho yokuphathwa kwemali kuleli -iMonetary Policy, ukwenza imali – okungasenziwa kulandela ukuma kokusetshenziswa kwemali yakuleli, ukugcina igolide lelizwe layo yonke inotho kanye lokucebisa uhulumende ngokusebenzisa imali.

Ingcitshi kwezenotho, uNkosikazi Rita Mpofu uthi ye, imbali kaMangudya kuhlangothi lolu iyabukeka kodwa ukuqhatshwa kwakhe kuza ngesikhathi ibhanga lesizwe kuyizakhiwo nje ngoba akulamsebenzi eliwenzayo. Uthi ukusetshenziswa kwemali yakwamanye amazwe kuhle kwalulaza lelibhanga ngoba umphathi walo ubesaziwa njengomlawuli wemali yakuleli eyayibonakala ngophawu lwakhe lebizo lakhe emalini okungaseyi kwenzakala nxa ilizwe lingaqhubeka lisebenzisa imali yakwamanye amazwe.

Usomabhizimisi, uNkosikazi Samukeliso Nkolomi, uthi ibhanga leli lehluleka ngeminyaka edluleyo kubo2008 ukulawula ukusetshenziswa kwemali okwaze kwabangcono ngokuqala ukusetshenziswa kwemali yakwamanye amazwe.
Uthi ilizwe belivele lizisebenzela kuhle kunyanga lezi kungela mphathi omkhulu kodwa khathesi sokuzamele abhadalwe amaqubaquba email lona ilizwe lingela ngitsho indibilitshi.

Uqhubeke esithi ngombono wakhe bekungayekelwa nje lesisikhundla singelamuntu kumbe lona lelibhanga livale okwesikhatshana kungabi ndabazalutho.

UNkosikazi Mpofu uthi uMangudya wake wathwalisana nzima lenkampani yabomakhalekhukhwini iEconet ngesikhathi ingena kwezokugcina imali kazulu okuletha ukungahlaliseki ukuthi kazukuletha izinqumo eziphazamisa ukusebenza kwamankampani la na. Uthi ukuqhatshwa kwesinye njalo isiphathamandla esivela eCBZ kutshengisa ukuthi uhulumende ulobudlelwano obuthile lalelibhanga okumele bucungulwe ukuthi yibuhlobo bani obenza bakhwibitheke emisebenzini le.

Ocubungula ukuphathwa kwenotho, uMnumzana Michael Sibanda, laye ugcizelele ngodaba lwabaphathi abavela kubhanga leCBZ ethi akucaci ukuthi uhulumende angabe esitsho ukuthi lelibhanga yilo eliqhuba kuhle yini umsebenzi elizweni kumbe umongameli welizwe ulezizatho zakhe zokuthemba ingcitshi ezivela kulelibhanga kuphela.

Isakhamuzi, uNkosazana Cleopatra Msimanga, uthi yisikhathi esibi lesi kunotho yelizwe nxa kukhangelwa izikhathi umphathintambo wezemali uMnumzana Patrick Chinamasa asekewaguqula ilanga leholo lezisebenzi zikahulumende okutshengisa ukuthi ayikho imali elizweni. Uthi akula nguquko ebambekayo kunotho yelizwe, izisebenzi azitholi iholo elilakho ukuziphilisa kungakho yena kaboni ukuthi umphathi lo omutsha uzokwenza zimanga bani.

Esinye njalo isakhamuzi, uMnuzana Elijah Mkhwananzi, uthi kusobala ukuthi kulenkethabetshabi eZimbabwe ngoba kungani osibalukhulu bengani bavela emhlubulweni owodwa welizwe. Uthi ezinye izigaba zelizwe zizaqhubeka ziswela intuthuko ngoba abantu abenza imithetho bengazi ukuthi kuyini okuswelakalayo kulezi zigaba.

Wengeze esithi kusobala ukuthi iminwe ayilingani ngoba kungenjalo aluba ilizwe selike lathola usibalukhulu ovela emhlubulweni wangezansi kwelizwe ngemva kukazibuse owayekhangelele ukulinganisa amathuba abantu abansundu bonke labamhlophe.

UDokotela Mangudya uyaba ngusibalukhulu wakuqala ongelamali elophawu lwakhe kulandela ukusetshenziswa kwemali kaMnumzana Kombo Moyana ngo 1983 kusiya ku1993, ekaMnumzana Leonard Tsumba ngo 1993 kusiya ku 2003 kanye lekaMnumzana Gono kusuka ku2003 kuze kucine ukusetshenziswa kwemali yakuleli.

I Reserve Bank of Zimbabwe yasungulwa ngo Mbimbitho ngomnyaka ka1956 lapho eyayisaziwa ngokuthi yiBank of Rhodesia and Nyasaland. Simtshayela ihlombe uDokotela Mangudya ngalesisikhundla sakhe, inengi kuzulu lisithi nanku umsebenzi, asazi iyozala nkomoni.
please wait

No media source currently available

0:00 0:07:05 0:00
Lapho esitholakala khona
XS
SM
MD
LG