amalinks wokungena

Breaking News

Abasakhulayo: Usuku lweRobert Mugabe National Youth Day Luyasithuka


Abasakhulayo

Abasakhulayo bathi usuku lolu bangeke balujabulele ngoba uMugabe wabulala amalungelo oluntu, wakhokhela umbuqhazwe owe Gukurahundi njalo wabulala umnotho.

NgoLwesithathu bekulusuku lokunanza ilanga lokuzalwa lowayengumongameli uRobert Mugabe. Usuku lolu lubekwe ukuba likhefu nguMongameli Emmerson Mnangagwa ethi abasakhulayo kumele balwenze usuku lokukhumbula uMugabe ukuze balandele isibonelo esihle sempilo yakhe.

Abasakhulayo emhlubulweni wemaNdebeleni bathi ngeke balusebenzisa ngaleyo ndlela lolu suku bethi lubakhumbuza uchuku lukaMugabe.

Umnumzana Mthandazo Ndlovu uthi kungcono ukuthi atshone ekhumbula izihlobo zakhe ezabulawa ngumbuqazwe weGukurahundi kumbe ayelima.

Omunye njalo osakhulayo umnumzana Mthokozisi Ndebele uthe akumelanga kube likhefu njalo kuyamphambanisa ikhanda ngoba wakhula nzima izinto zisilela ezitolo befunda nzima ezikolo ngenxa yokuswela amatishala.

Unkosikazi Beauty Ncube uthi ilanga leli bekungamelanga lenziwe isikhumbuzo sikaMugabe ethi akula lutho abantu abangalujabulela ngaye ngenxa yokuthi bancindezelwe njalo abalamsebenzi, labantu baswela ukwelatshwa ngoba izibhedlela zingasebenzi kuhle.Umnumzana Limukani Dlamini uthi usuku lolu luyinhlamba ebantwini beMatabeleland ethi uMugabe wadala umbuqazwe njalo umangazwa yikuthi uMnangagwa uthi abatsha benze njengoMugabe ethi kutsho ukuthi abatsha kumele labo bebengababulali.

Osakhulayo umnumzana David Ndlovu uthi angazi ukuthi athabe kumbe adane ngalolusuku ngoba uMugabe walelwa inkululeko kodwa wasesona njalo izinto ezitolo azithengeki.

Usuku lukamhla ka 21 Nhlolanja eminyakeni edlule bekulilanga lapho obekusenziwa umkhosi omkhulu kubuthaniswa imali enengi yokuthakazalela ilanga lokuzalwa kukaMugabe kodwa lonyaka belulikhefu, abantwana abayanga esikolo njalo amahofisi kahulumende abevaliwe kodwa amabhizimusi abantu abazisebenzayo abevuliwe ngoba seliphiwe igama elitsha lokuthi lilanga labasakhulayo ele Robert Mugabe National Youth day.

please wait

No media source currently available

0:00 0:04:38 0:00

Facebook Forum

XS
SM
MD
LG