amalinks wokungena

Breaking News

UTsenengamu Uncitshwa Imvumo Yokuhlawula iBheyili


U-Godfrey Tsenengamu osewaphuma kubandla leZanu PF.

UMantshi Ngoni Nduna waseHarare uthi uzakwethula isinqumo sokuba owayekhokhela ugatsha lwabatsha kuZANU PF, uGodfrey Tsenengamu atholiswe imvumo yokuhlawula na isibambiso seBail loba hatshi Ngolwesibili.

UTsenengamu wetheswa icala lokufuna ukubangela udlakela elizweni kulandela ukutshengisela okwakuhlelwe mhlaka 31 Ntulikazi eHarare. Icala linye letheswa njalo abanye abezombusazwe abagoqela uMnu Job Sikhala owe MDC Alliance, u Mnu Jacob Ngarivhume owe Transform Zimbabwe lentathelizindaba elodumo uHopewell Chingono.

Abathathu laba baqeda amaviki ambalwa bevalelwe eChikurubi andubana baphiwe imvumo yokuhlawulela ibheyili ukuzwe lithoniswe icala labo bevela emizini yabo.

UTsenengamu namhlanje umiswe phambi komthethwandaba kaMantshi ecela ukuba aphiwe imvumo yokuthoniswa esuka ngekhaya, kodwa uNduna uthe kakatholi isikhathi sokwahlaziya udaba lwakhe esithi uzakupha isinqumo kusasa.

UTsenengamu utshele idale ukuba wesabela impilo yakhe ngemva kokuba abantu abangaziyo beqhubeka bemlandela.

Icala lika Tsenengamu liza ngemva kokuba ekhuthaze uzulu weZimbabwe ukuba atshengisele esola udubo lwenkohlakalo olwehlele ilizwe ikakhulu Phakathi kweziphathamandla zikahulumende ekutshengiseleni okwakumele kwenziwe mhlaka 31 Ntulikazi lonyaka.

Umsekeli wesikhulumeli seMDC Alliance uMnu Felix Magalela Mafa uthi ukubotshwa kuka Tsenengamu lokhu yikwethuselwa nguhulumende.

“Thina abe MDC Alliance asithandabuzi ukuba iZANU PF ibopha abantu abakhuluma iqiniso. Siyakwazi ukuba uSikhala wayebotshiwe ngoba owayephambili vele ngu Sikhala owebandla lethu”

Ukubotshwa kuka Tsenengamu kuza ngesikhathi okhokhela izifundi zemakolitshini enhlanganisweni eye ZINASU, uTakudzwa Ngadziore elokhe evalelwe ngemva kokubotshelwa ukutshengisela emahofisini enkampani ye Impala esola ukuthunjwa kwesinye isifundi uTawanda Muchehiwa.

Kunje laye uNgadziore lokhe emelele umthethwandaba ukuba uphe isinqumo kusicelo sakhe sokuvunyelwa ukuhlawulela isibambiso sebheyili.

Luza njalo ngesikhathi amantombazana athi ummeli we Harare West uJoannna Mamombe, uCecilia Chimbiri lo Netsai Marova abe MDC Alliance besetheswa icala lokuqamba amanga ukuba bathunjwa lokutshengisela okungekho emthethweni.

Kulonye udaba obe lusemthethwandaba namhlanje owasebenzala idolobho le Harare uMnu Fani Machipisa oyetheswa icala lokuhluthuna isithanda emzini weMalbereign eHarare esipha abantu okungekho emthethweni uncitshiwe imvumo yokuhlawulela ibheyili ngumthethwandaba kaMantshi.

Igqwetha lakhe uMnu Lovemore Madhuku uchasisa ngokuncitshwa kuka Machipisa ibheyili.

“Bengimela umNu Machipisa uncitshwe ibheyili ngu Magistrate. Bamncitshe besithi uzaphambanisa labafakazi bakahulumende. Akukho egcekeni lokhu njalo asivumelani lakho”

UMachipisa ubikwa wathatha umhlabathi lo, ngomnyaka ka 2018 ngesikhathi esesikhundleni sokubhaliswa kwezindlu kudolobho le Harare. UMadhuku uthi udaba lolu sebezalukhweza emthethwandaba waphezulu oweHigh Court bephikisa ukuncitshwa kwakhe ithuba lokuhlawula ibheyili.

Udaba Esilethulwe NguMlondolozi Ndlovu
please wait

No media source currently available

0:00 0:03:16 0:00


Facebook Forum

XS
SM
MD
LG