amalinks wokungena

Uyaqala Umhlangano Wokugqiba Uhlelo lweMandela Washington Fellowship

  • Ntungamili Nkomo

UGilmore Moyo, uLesley Phiri loMthabisi Onias abakuhlelo lweMandela Washington Fellowship baxoxa emhlanganweni wabakuhlelo lolu eWashington DC eMelika.

Abasakhulayo abayinkulungwane eyodwa abakuhlelo lweMandela Washington Fellowship abavela emazweni akuzwekazi leAfrica atshiyeneyo okugoqela abeZimbabwe abangamatshumi ayisithupha bathe gwaqa eWashington DC, eMelika, ngoMvulo emhlanganweni omkhulu wokugqiba loluhlelo.

Umhlangano lo uvulwe okusemthethweni ngosaphethe isikhundla sikamphathintambo wezemfundo lamasiko kugatsha olubona ngobudlelwano beMelika lamanye amazwe olweState Department, uMnu. Mark Taplin.

UTaplin utshayele ihlombe abasakhulayo laba ngokugqiba izifundo zabo kumaviki ayisithupha edluleyo esithi ulethemba bazasebenzisa ulwazi abalutholileyo ukuthuthukisa amazwe abo.

UMnu. Taplin, yena owake wahlala emazweni eAfrica atshiyeneyo agoqela eleZimbabwe ukhuthaze njalo abasakhulayo laba ukuthi balandele isibonelo sobukhokheli obuqotho esabekwa ngowaba nguMongameli weSouth Africa uMnu Nelson Mandela.

“Lingabuyela emazweni enu kumele lihlanganise elikufundileyo phansi kohlelo lolu lolwazi elivele lilalo ukuthuthukisa impilo zikazulu,” kutsho uMnu Taplin.

Omunye wabakuhlelo lolu, uMnu. Frederick Nkiwane, utshele iStudio 7 emhlanganweni lo ukuthi kunengi akufundileyo.

Umhlangano lo uyaqhubeka ngoLwesibili njalo uzagqitshwa ngoLwesithathu yiziphathamandla zikahulumende weMelika ezigoqela uSenator Chris Coons omela isigaba seDelaware.

UMongameli Donald Trump yena ubikwa engasoze abe khona kulumhlangano.

Owasungula uhlelo lolu esangumongameli weMelika, uMnu Barack Obama, wayevame ukubakhona emhlanganweni lo.

Facebook Forum

XS
SM
MD
LG