amalinks wokungena

Breaking News

Uzulu Uhlaba Umkhosi Ngemizamo Kahulumende Yokuthi Athathe Isikwelede seZiscosteel


Abantu bazonde okumangalisayo ngokuzama ukuthi bathathe isikwelede seZiscosteel.

Ikhomithi yedale lepalamende ebona ngezemali ibisebenza koBulawayo ngoLwesine lapho ebithapha khona imibono kazulu mayelana lomthetho ozavumela uhulumende ukuthi athathe isikwelede sekampani yeZimbabwe Iron and Steel Company (Ziscosteel) eyabhidlizwa yikungethembeki kwaziphathamandla zayo.

Uzulu wako Bulawayo uveze ukudana lokungathembi uhulumende ngemizamo yokuthi athwale isikwelede sekampani yeZiscosteel eyavalwa okusemthethweni ngomyaka ka2016 ngenxa yokwehluleka ukuqhuba kuhle inhlelo okwadala izikwelede kanye lokwehluleka ukubhadala izisebenzi. Isikwelede seZisco siphose sibe yizigidi ezingamakhulu amahlanu - $495 million.

Isakhamuzi sakoBulawayo esisakhulayo ebesisemhlanganweni, uMnu. Mbekezeli Hlabano, uthe kungakathathwa isikwelede nguhulumende kumele kuqale kuhlolisiswe ukuthi okwabangela isikwelede kuyini njalo kubotshwe labo ababangela ukufa kwamakhampani ethi ngesikhathi ibhanga elikhulu leZimbabwe lidala izikwelede uzulu wacina ebhadaliswa izikwelede kwazovela ukuthi abantu abatshotshayo ngobani.

Esinye njalo isakhamuzi, uMnu. Phumulani Moyo, uthe kavumelani lokuthi uhulumende athathe isikwelede seZiscosteel esithi umumo welizwe awuvumi ngoba imali leyo kumele isebenze ukubhadala odokotela abakhalele umsebenzi kanye lokuthuthukisa ezinye izigaba zelizwe ezinjengemfundo.

UNkosikazi Florence Ndhlovu uthe ufisa ukuthi kulandelwe isisekelo sombuso njalo kuhlolisiswe ukuthi isikwelede sadalwa yini njalo labo abaficwa belamacala bajeziswe.

Uthe abantu sebediniwe ngokuhlala bebhadala izikwelede zikahulumende.

Omunye njalo okhonona ngalokhu nguMnu. Paul Ngwenya othe umthetho olungiswayo ufaka umthwalo wesikwelede kuzulu okuzakwenza ukuthi impilo yabo ibenzima.

UMnu. Prince Dubeko Sibanda, olilunga ledale lephalamende, uthe sebebhode endaweni ezehlukeneyo bekhulumisana lozulu njalo kusobala ukuthi abantu sebediniwe ngokuthwala izikwelede ezadalwa ngabantu abalutshwana.

Uthe abantu laba abatshotshayo bayaziwa ethi abantu laba sebebusa sebefuqela imthwalo kuzulu.

Umhlangano lo ububizwe lidale lephalamende njalo ubukhokhelwa ngamalunga edale leli ahlala kukhomithi ebona ngezemali.

Umthetho lo ozavumela ukuthi uhulumende athathe isikwelede wenziwe ngoZibandlela lonyaka kodwa awukadluli edale lephalamende.

Inkampani yeZiscosteel yayilezisebenzi ezingaphezu kwenkulungwane ezinhlanu. Amakampani amanengi koBulawayo kanye lelizweni lonke jikelele ayesebenzelana lenkampani yeZiscosteel lawo avalwa, amanye aphungula izisebenzi kuthi amanye asethwele nzima ukuthi athole insimbi lokunye ezazikuthola eZiscosteel.

Udaba Esilethulelwe NguBathule Masuku
please wait

No media source currently available

0:00 0:04:21 0:00

Facebook Forum

XS
SM
MD
LG