Abenhlanganiso ezimela amalungelo okwethulelwa kukazulu imibiko ngokukhululekileyo lolwazi oluqakathekileyo, bathi ukuphiwa kwamalicense okusakaza abakumsebenzi wemisakazo yezigaba, amaCommunity Radio Stations, kuzanceda kakhulu ukusabalalisa ulwazi oluqakathekileyo eZimbabwe.
Bathi ulwezi lolu lugoqela isimo somkhathi esenze ukuthi kungabi lezulu emhlabeni wonke jikelele, ingozi ezehlela izigaba lokutshiyeneyo.
Ekhuluma emhlanganweni obuqoqwe ngabenhlanganiso yabakhankasela ukukhululwa kwamagagase ukuze kube lemisakazo yezigaba eyeZimbabwe Association of Community Radio Stations, umholi walinhlanganiso uNkosikazi Vivian Marare Zhangazha, uthe uhulumende kumele azwisise ukuqakatheka kwalimisakazo ngoba iluncedo kunhlalakahle kazulu.
“Kumele babone ukuba bengenelisa ukwenzani ukuze bazivikele engozini. Imisakazo yezigaba inganceda njani ukupha izigaba ulwazi ngokuvikelwa kwalezi ndubo.”
Lokhu kusekelwe nguNkosikazi Siphathisiwe Ncube wenhlanganiso yeNtepe Communuity Radio Initiative yona engeyinye yenhlanganiso ezimelele ukuphiwa imvumo yokusakaza nguhulumende.
“Njenge Ntepe FM sibona angani kungasinceda kakhulu ukuvikela ekulwisaneni lokuguquka komkhathi okungenza abantu babelempilo”
Ekhuluma emhlanganweni lo, umngcisihlalo wohlangothi lukahulumende olulawula umsebenzi wokusakaza olweBroadcasting Authority of Zimbabawe, uMnu. Charles Sibanda, uveze ukuba imisakazo ilakho ukuphiwa imvumo yokusakaza kodwa bazaqakathekisa imisakazo enelisa ukuzimela yodwa.
Umsakazi olodumo oseleminyaka eminengi esezikhundleni zokuqondisa ukwethulwa kwezindaba, uMnu. John Masuku, uvumelaa loSibanda esithi imisakazo yezigaba kumele izimisele ukudinga usekelo lwemali ezigabeni hatshi phandle.
Uzulu ubheke ngelihlo lokhozi uhlangothi lweBAZ ukuba luzenelisa na ukupha inhlangiso ezizimele zodwa imvumo yokusakaza njengoba iminyaka isiminengi kungenzakali lokhu.
