amalinks wokungena

'Bhalisa Kugwalo Lokuvota Kuhlandla Lesibili lweBiometric Voter Registration Blitz'


Umgcinisihlalo weZEC ukhuluma lentathelizindaba ngohlelo lweBVR lusanda kusungulwa ngoMpandula eHarare.

Ihlandla lakuqala lohlelo lokubhalisa ukuvota kusetshenziswa iminwe kumbe amehlo lezinye izitho zomzimba olwe Biometric Voter Registration (BVR) solufike emaphethelweni ngesikhathi abanye abantu bethandabuza uhlelo lolu.

Abanye njalo bayehluleka ukubhalisa kugwalo lokuvota olulotshwa yiZimbabwe Electoral Commission (ZEC).

Inengi labantu koBulawayo libuyiselwe emuva ngoba lingela ncwadi sesiqiniseko salapho abahlala khona, iproof of residence, kuthi abanye njalo bavele bengelinganga lokuya eZEC ngenxa yokuswela izithupha.

Isakhamuzi sakoBulawayo, uMnu. Mathew Sibanda, ukhuthaze uzulu ukuba asukumele phezulu kuhlandla lesibili elilandelayo ayebhalisa ukuvota ukuze bakhuphe uhulumende olocuku embusweni.

Umtshina weBiometric Voter Registration.
Umtshina weBiometric Voter Registration.

Induna uVusumuzi Prince Mabhikwa uthe abantu bayenelisa ukubhalisa kodwa inengi emangweni wakhe liyehluleka ukuyabhalisa ngoba abalazithupha osekubangele lokuthi abantwababo lezizukulu zehluleke ukuyabhalisa ngenxa yokuba incwadi zabo zatshabalala ngesikhathi sombhuqazwe weGukurahundi.

Uthe akulahlelo oseluzize abantu laba.

Olwela amalungelo oluntu, uMnu. Mzaca Ngulube, uthe kuqakathekile ukuba kuyiwa kuhlandla lesibili lokubhalisa ukuvota uhulumende abelohlelo lokunceda labo abalahlekelwa zincwadi zabo zokuzalwa lezithupha ngesikhathi sombhuqazwe weGukurahundi ukuze labo benelise ukubhalisa ukuvota baphatheke kunhlelo zokuthuthukisa ilizwe ngoba kulilungelo labo.

Isakhamuzi seLupane, uNkosikazi Simangele Dube, uthe uhlelo lokubhalisa ukuvota solusenziwa eLupane kodwa inhlupho ezikhona ngezokuswela izithupha lencwadi zokuzalwa ngoba abantu abanengi zintandane ezahlukumezeka ngesikhathi sombhuqazwe weGukurahundi.

Uthe kubanzima uma besiyadinga lezoncwadi kudingakala abafakazi abangekhoyo.

Omunye wababhalise kugwalo lokuvota.
Omunye wababhalise kugwalo lokuvota.

Inhlandla linye ngalinye lokubhalisa ukuvota lithatha amalanga alitshumi lasithupha, sekusele amahlandla amathathu lungakapheli uhlelo lolu.

Uhlelo lweBVR luqale ngemva kokuguquka kwenhlelo ezimbalwa ezokubhalisa kugwalo lokuvota.

Kwasuswa abantu ababesebenza komsitheli ababengaphansi kuka Mnu. Tobaiwa Mudede owohlangothi lukahulumende olwe Registry General.

Ihlandla elilandelayo liqalisa ngeSonto endaweni ezitshoyeneyo.

Facebook Forum

XS
SM
MD
LG