amalinks wokungena

Inhlanganiso Ezitshiyeneyo Sezikhanga Uzulu Ukuba Abhalise Kugwalo Lokuvota


Uzulu ukhuthazwa ukuba ayebhalisa kugwalo lokuvota.

Ikhomishini ebona ngezokhetho iZimbabwe Electoral Commission (ZEC), ibambisane lenhlanganiso ebona ngokulondolozwa kwelungelo loluntu eye ZimRights labaculi ngoLwesithathu ukusungula uhlelo lokufundisa abantu ngezokhetho bebakhuthaza ukuba bayebhalisa ukuvota ngaphansi kohlelo lweBiometric Voter Registration (BVR) oselungene kudlandla lwesibili.

Amabandla ezombusazwe lezinye inhlanganiso ezizimeleyo seziphume ijumo zayakhuthaza abantu ukubhalisa ukuvota kanye lokuthi bavote ngomnyaka ozayo.

Abaculi lenhlanganiso ezitshiyeneyo zisebenzisa lokhu emkhankasweni wokukhanga abantu ukuba bebhalise kugwalo lokuvota.
Abaculi lenhlanganiso ezitshiyeneyo zisebenzisa lokhu emkhankasweni wokukhanga abantu ukuba bebhalise kugwalo lokuvota.

Inhlanganiso yeZimRights ibambene lomculi uKhuxman le Victory Siyanqoba bangena kulanga lesithathu bebhoda koBulawayo ngemota bekhankasela ukuthi abantu bayebhalisa ukuvota.

Izilindo zamabhasi koBulawayo eGodini, eRenkini, eNtumbane leNkulumane Mall kanye lamalokitshi ambalwa ngezinye zezindawo ezithe zafinyelelwa ngaphansi kwalo umkhankaso.

Umgciningcebo weZimrights, uMnu. Themba Chiveya, uthe uhlelo lokukhankasela ukuthi abantu bayebhalisa ukuvota lujonge ukuthi wonke umuntu ayebhalisa kungakhathalekile ukuthi sewake wavota kumbe hatshi.

Uhlelo lokuvota lusungulwe ngoMpandula.
Uhlelo lokuvota lusungulwe ngoMpandula.

Umculi uKhuxman Khulekani Bethule ugcizelele esithi kumele abantu baphume ngobunengi babo ukuyabhalisa kugwalo lokuvota.

UNkosazana Easter Zitha, oweqembu lomculo weMbube eleVictory Siyanqoba, uthi nxa abantu besiyabhalisa kumele bahambe labaphila lobugoga.

Osakhulayo uJacquline Ndlovu uthe esikolo seMpumelelo Primary eMpopoma akukhombisi ukuba iZEC iyabhalisa abantu.

Umkhankaso wokudinga abantu bokubhalisa kugwalo lokuvota.
Umkhankaso wokudinga abantu bokubhalisa kugwalo lokuvota.

Usole kakhulu lokuthulisa kwayo emisakazweni lakumabona kude mayelana lohlelo lolu.

USikhululekile Moyo laye uvumelane loMaNdlovu esithi abantu baphuzile ukwaziswa kodwa esithi uhlelo abaluqalileyo lukhanya luzaba lempumela.

Uhlelo lokubhalisa ukuvota lungene kuhlandla lesibili ngeSonto edluleyo kodwa koBulawayo lakwezinye indawo zeMaNdebeleni jikelele kubelenani eliphansi labantu ababhalise ukuvota uma kuqathaniswa lezinye izigaba zelizwe.

Umkhankaso wokubhalisa ukuvota awukatholi ukubukiswa kumabonakude kanye lokusakazwa osekutshiye inengi labantu lingazi ngohlelo.

Facebook Forum

XS
SM
MD
LG