Uhulumende weZimbabwe uvote kumanyano weUnited Nations esala ukwamukela iziqondiso eziphathelane lokulondolozwa kwamalungelo kazulu lokwenqabela ukubulawa kwabantu mahlayana ngokwemihlobo kanye lokuvikela imbhuqazwe efana loweGukurahundi.
Emhlanganweni oqhutshelwe eNew York ngoLwesibili, iZimbabwe ibe ngenye yamazwe alitshumi lanhlanu ale ukwamukela leziziqondiso.
Amazwe la agoqela eleNorth Korea, iRussia, China, Eritrea, Syria lamanye njalo wonke etheswa amacala okwephula amalungelo oluntu.
Alikhulu eliletshumi lanhlanu avote esamukela agoqela eleBotswana, iSouth Africa, iMelika, iBhilithane lamanye.
Kulamanye njalo angamatshumi amabili lasitshiyangalombili afana laboKenya, Ethiopia, Algeria, Namibia leCameroon angavotanga.
Uhulumende kaMongameli Emmerson Mnangagwa uchothozwe ngabanengi ngokungamukeli iziqondiso lezi besithi ukhanya esesaba udaba lombhuqazwe weGukurahundi ukuthi lungacina luphathwa yiUnited Nations.
Kodwa isikhulumeli sikaMnangagwa, uMnu George Charamba, eloba enkundleni yeTwiter, uthe uhulumende wale ukuvotela iziqondiso lezi ngoba ekwazi ukuthi amazwe afana leMelika afuna ukuzisebenzisa ukugenqula abanye ohulumende njengalokhu okwenzakala kweleLibya kuze kususwe umuyi uMnu Muammar Gaddafi, yena owabanjwa ngabahlamuki sokuvuke impi bambulala.
Ukuhlaziya loludaba sixoxe lentathelizindaba uMnu Simbarashe Nembaware kanye lolwela amalungelo oluntu uMnu Mthulisi Hanana Ncube onguye osungula lingxoxo.
