Sokuleminyaka emibili owayengumongameli umuyi uRobert Mugabe wasuswa esikhundleni libutho libambisana lowayemxotshe ukuba ngumsekeli wakhe, uMnu. Emmerson Mnangagwa, owayebaleke wayahlala kwele South Africa.
Abanye abantu bathi akulalutho osoluguqukile kulandela ukususwa kuka Mugabe esikhundleni njengoba umnotho usubhidlika okumangalisayo kuthi njalo kukhanya sisibi okwamagama isimo somnotho welizwe.
Bakhona njalo abakubandla leZanu PF abathi kukhanya ilizwe libhidlika okumangalisayo ngesikhathi uMnangagwa esithi udinga uncedo kwamanye amazwe lokuvuselela umnotho.
Kukhanya engani uMnangagwa katholi uncedo alufunayo ngenxa yokuthi amanye amabandla aphikisayo agoqela eleMDC elikhokhelwa nguMnu. Nelson Chamisa athi kakhethwanga ngemfamelo.
Abalandeli bebandla leMDC bathi kusobala ukuthi basetshenziswa libandla leZanu PF ukuthi basuse uMugabe esikhundleni.
Okhokhela iqula lamalunga edale lephalamende aweMDC, uNkosazana Thabitha Khumalo, uthi baphatheka kulelinyathelo becabanga ukuthi kwakuzoletha inhlalakahle yabantu.
Wengeza uMaKhumalo esithi sekube sobala khathesi ukuba lelonyathelo lalingelani lokulungisisa isimo elizeni.
Kodwa abalandeli lenkokheli zeZanu PF, abagoqela uMnu. Munashe Mtutsa olilunga ledale lenkokheli yaleli bandla koBulawayo, uthi leli nyathelo selilethe izithelo ezimbalwa.
Ingcwethi ecubungula ezombusazwe, uMnu. Tjenesani Ntungakwa, uthi okwenziwa ngamalunga edale lephalamende ngalolosuku kwaba liphutha.
Umongameli Emmerson Mnangagwa uhlezi etshela uzulu ukuba akabekezele ngoba ezimisele ukuthuthukisa inhlalakahle kazulu kanye lokuguqula umnotho welizwe.
Kodwa uzulu, ingcwethi kwezombusazwe kanye labamandla aphikisayo bathi batheza olulenkume ngoba akubonakali okwenziwa nguMnangagwa lebandla lakhe elibusayo.
